Son xa sete anos celebrando o Día Mundial de Concienciación sobre a Accesibilidade, no que distintas compañías e entidades únense para reclamar unha tecnoloxía pensada e deseñada para todas as persoas, incluídas as persoas con discapacidade e maiores.

Nestes anos celebráronse cada vez un maior número de actos en todo o mundo en conmemoración deste día no que empresas, universidades e entidades demandan unha maior presenza da accesibilidade no deseño e desenvolvemento de produtos, servizos e aplicacións tecnolóxicas.

Na edición deste ano foron preto de setenta os actos que tiveron lugar ao longo de todo o mundo dentro da celebración deste día dedicado á accesibilidade tecnolóxica.

Pola nosa banda, queremos aproveitar este día tanto para destacar os avances que nestes meses fomos relatando, como para pedir un maior esforzo a todos os actores da sociedade para que o deseño para todos e a accesibilidade universal sexan unha realidade.