• Os maiores de 65 anos son as persoas en España que máis utilizan as tecnoloxías da información e a comunicación no coidado da súa saúde, segundo o Informe Anual ‘A sociedade en rede' publicado polo Observatorio Nacional das Telecomunicacións e da Sociedade da Información (ONTSI)

No conxunto da poboación, apenas unha de cada catro persoas (o 27%) utiliza este tipo de tecnoloxías en temas relacionados coa saúde.

Con todo, entre os maiores, debido en gran medida á maior presenza de enfermos crónicos, case a metade, o 43,8%, fai uso das TIC.

O informe do ONTSI sinala que o factor principal para o uso destas tecnoloxías é, como comentabamos, ter unha enfermidade crónica, xa que o 39,2% das persoas cunha afección deste tipo utiliza as TIC.

Pola contra, entre as persoas que non teñen unha doenza crónica, o uso das tecnoloxías da información baixa ata o 12,9%.

En canto á razón pola que utilizan estas tecnoloxías, dúas de cada tres acceden a elas por vontade propia, mentres que un de cada catro fano por prescrición médica, especialmente os maiores (43,7%).

Entre os servizos TIC máis utilizados está a receita electrónica (88,7%) e a petición de cita por Internet (82,1%), mentres que os menos coñecidos son a historia clínica dixital (53,5%), o sistema de quendas (49,6%) e o envío de SMS ao paciente (39,9%).