Tras o descanso estival, os Espazos +60 de Afundación abrirán de novo as súas portas o vindeiro venres 1 de setembro. Para o curso 2017-2018 deseñáronse novos programas que teñen como obxectivo poñer en valor o papel dos maiores na sociedade, ofrecer unha imaxe social desta poboación afastada de estereotipos e crear oportunidades para que as distintas xeracións estean conectadas. Así, as actividades que se desenvolverán neste período estarán centradas, ademais de en o fomento da aprendizaxe ao longo da vida, do benestar físico e do desenvolvemento persoal, na participación activa na sociedade das persoas maiores, a través de programas interxeracionais e de voluntariado social e profesional. "En Afundación traballamos seguindo as pautas do denominado envellecemento activo, que permite incrementar a satisfacción, o benestar, a calidade de vida e indirectamente contribúe a unha diminución dos problemas de saúde física e psicolóxica. Así, na medida en que as persoas envellezan de maneira máis saudable, serán máis capaces de levar unha existencia autónoma e independente e de participar de forma activa na súa comunidade", subliña Sabela Couceiro, coordinadora da área de Envellecemento Activo de Afundación.
A proposta de programación nos Espazos +60 estrutúrase en seis programas:
- O primeiro deles é "O valor da experiencia", co que se propician oportunidades para que as persoas socias poidan compartir a súa experiencia profesional e de vida a través de accións de voluntariado. Nesta liña enmárcase a iniciativa "Fálame da emigración" na que participaron no curso pasado 71 voluntarios e voluntarias, 18 IES e 825 mozos. A programación inclúe tamén conferencias e talleres, actuacións musicais e teatrais ou clubes de lectura impartidos todos por persoas socias.
- O segundo programa é "Formación e coñecemento", a través do que se propoñen actividades que favorecen a aprendizaxe de idiomas, o coñecemento do patrimonio, as humanidades ou a formación en novos temas e fenómenos sociais emerxentes.
- O terceiro é "Cultura dixital", que consiste nunha formación centrada no uso das tecnoloxías da información e da comunicación, desde a perspectiva da revolución tecnolóxica actual e o alcance da internet.
- "Hábitos saudables", é dicir, o cuarto programa, consiste na celebración de actividades físicas pero tamén de desenvolvemento cognitivo, benestar psicolóxico ou nutrición, entre outras.
- "Expresión artística", pola súa banda, implica aprendizaxe da música, debuxo, teatro ou artesanía, entre outros.
- Por último, "Lecer activo" consiste a programación de viaxes nacionais e internacionais e visitas culturais a museos, rutas históricas etcétera.
A partir do venres 1 de setembro, as persoas interesadas en facerse socias poden dirixirse aos Espazos +60 das súas cidades para informarse e/ou facer a súa reserva.
