O programa InLugo que promove a Deputación para o uso das tecnoloxías da información conseguiu a penetración no ámbito da terceira idade. E é que máis de 400 maiores da provincia participaron neste cuarto trimestre nas actividades que se programaron dentro do citado proxecto, que xestiona a Fundación TIC. Un dos seus patróns e vicepresidente provincial, Álvaro Santos, visitaba onte un dos talleres gratuítos que se imparten na sede da TIC, en concreto o titulado Escribe non ordenador empregando un editor de texto, ao que acoden quince persoas. Os maiores aprenden a dar os seus primeiros pasos e a familiarizarse co uso do teclado do computador e os aspectos máis básicos do procesador de textos WordPad. Pero InLugo ten outras actividades de formación, como Alimentatic, un programa de talleres para mellorar, a través das novas tecnoloxías, os hábitos de alimentación dos maiores. En outubro participaron 200 persoas en cursos en Láncara, O Corgo ou Guitiriz. As charlas foron impartidas polo especialista en Nutrición Manuel Antonio Botana. Este mes, este programa chegará a Paradela, Pol e Ourol.