O audiófono exoaural é un dispositivo que corrixe ou ecualiza as deficiencias do sistema auditivo (e dos sistemas de reprodución e auriculares involucrados) da mesma maneira que unhas lentes corrixen os defectos do sistema visual.

Agora, un destes dispositivos foi creado por investigadores da ETSI Sistemas de Telecomunicación da Universidade Politécnica de Madrid (UPM). Pódese aplicar en calquera aparello comercial de audio e mesmo pode funcionar como audiófono clínico.

Por moi perfectos e precisos que sexan os sistemas de reprodución de son, altofalantes e auriculares, non existe ningunha garantía de que escoitemos de forma óptima debido á particularidade do noso propio sistema de audición biaural. Estas particularidades ou capacidades das que dispomos para escoitar os sons descríbense mediante a audiometría.

As curvas audiométricas están relacionadas coa maneira na que percibimos a variación dos sons de acordo co volume ou forza (intensidade) e coa velocidade de vibración das ondas sonoras (ton ou frecuencia). As curvas audiométricas de cada individuo son únicas e 'distorsionan' o son que chega ao sistema auditivo segundo as súas propias particularidades.

O audiófono exoaural desenvolvido por Lino García, Antonio Mínguez, Francisco Javier Tabernero e Jorge Grundman, investigadores da UPM, modifica o son que sae dun reprodutor (analóxico ou dixital) de maneira inversa ás curvas audiométricas propias de cada individuo para corrixir ou ecualizar a súa 'distorsión'. Desta maneira, o son que percibimos é exactamente o son reproducido e non o son distorsionado polo noso sistema auditivo, caracterizado mediante curvas audiométricas.

Captura da resposta audiométrica

Este audiófono exoaural insérese entre o oído e o sistema de reprodución de audio, compensando tanto a resposta audiométrica do usuario como a resposta de todos os elementos da propia cadea de audio. A característica principal do novo dispositivo 'hardware ou software, en función das capacidades de programación que teña o sistema de reprodución de audio' estriba na súa capacidade para capturar nunha fase de configuración a resposta audiométrica do usuario e cargar as respostas de todos os elementos da cadea de audio (auricular, reprodutor, etc.) e compensala posteriormente en tempo real para obter unha resposta ideal na fase de operación.

O dispositivo non se limita unicamente a persoas con disfunción auditiva severa, como o fan os actuais audífonos, senón que se xeneraliza de forma universal para calquera suxeito que dispoña da súa resposta audiométrica en toda a marxe de frecuencias de audio (non só de voz) até os 16 kHz e corrixir así a súa percepción auditiva, por lixeira que sexa, para ter a maior calidade de audio posible.