Investigadores das universidades de California en Bekerley e de Stanford crearon unha nova xeración de sensores flexibles que poden medir os cambios químicos da suor humana en tempo real. Os autores indican que se trata do primeiro sistema electrónico totalmente integrado capaz de proporcionar un control continuo, non invasivo da bioquímica múltiple da suor.

O estudo, que se publica no último número da revista Nature, incluíu a participación de 50 voluntarios (homes e mulleres) que realizaron actividades deportivas de interior e exterior, levando os sensores en contacto coa pel.

Segundo explica a Sinc Ali Javey, director do grupo de investigación de UC Bekerley e un dos autores, 'o sistema componse de cinco sensores que miden simultaneamente e de forma selectiva os metabolitos (glicosa e lactato) e electrolitos (ións de sodio e potasio) da suor, así como a temperatura da pel'.

Javey agrega que 'o panel de analitos diana e a temperatura da pel seleccionáronse pola información que fornecen para entender o estado fisiolóxico dun individuo'.

Por exemplo, afirma, 'a excesiva perda de sodio e potasio na suor podería traducirse en cambras musculares ou deshidratación; a glicosa da suor está metabólicamente relacionada coa glicosa en sangue e o lactato pode servir como un marcador sensible da isquemia de presión. Ademais, a temperatura da pel informa dunha variedade de enfermidades e lesións da pel 'como as úlceras por presión' ', di o enxeñeiro.

Javey destaca que o sistema mide en tempo real os sinais eléctricos xerados polo conxunto de sensores. Tras o procesamiento dos datos, o microcontrolador transmíteos por un módulo bluetooth e poden ser enviados a un teléfono intelixente onde se mostran nunha app.

Sensores e placa fexibles

A tecnoloxía 'componse de sensores electroquímicos flexibles que interactúan coa pel e circuítos integrados de silicio consolidados nunha placa (tamén flexible) para o procesamiento de sinais complexos', di o autor.

O dispositivo poderá ser usado en varias partes do corpo, como a fronte e os brazos, integrada en bandas do pelo ou pulseiras, por exemplo.

Respecto das posibles aplicacións, Javey comenta que o dispositivo 'poderá ser usado por calquera que faga exercicio. A suor humana contén unha información fisiológicamente rica, que lle fai un candidato ideal para ser estudado por sensores portátiles non invasivos. Dita información pode ser útil para alertar aos usuarios dos seus problemas de saúde, tales como fatiga, deshidratación ou temperaturas perigosamente altas do corpo. Tamén pode informar sobre calquera cambio químico sen necesidade dunha análise de sangue'.

Con todo, aclara, 'moitos biomarcadores da suor aínda non foron ben estudados. 'A nosa plataforma pode ser explotada ou reconfigurada para unha análise fisiolóxica exhaustiva en tempo real e para investigacións clínicas'.

Pola súa banda, George Brooks, experto en bioloxía integrativa de UC Bekerley e un dos autores do estudo, comenta que aínda que esta tecnoloxía funciona ben con persoas sas que fan exercicio, tamén se podería adaptar para analizar outros fluídos corporais de persoas que sufran enfermidades e lesións.