As barreiras ás que as persoas con discapacidade se enfrontan cada día non só están nas rúas das cidades, no transporte público ou nos seus lugares de traballo e estudos. Tamén poden estar nos equipos informáticos. As novas tecnoloxías ofrecen unha magnífica oportunidade de derrubar obstáculos, pero para que así sexa é necesario que nos aseguremos de que os dispositivos e os programas que van aparecendo no mercado sexan accesibles.

Por sorte, existen investigadores que traballan para conseguilo, creando software específico e axustado ás necesidades das persoas con discapacidade. Imos proporche algúns exemplos que poden resultarche interesantes.

1. Navegadores accesibles ou adaptados

ZAC Browser foi deseñado para axudar a descubrir os beneficios de Internet a nenos con autismo. Con el atopan máis facilidades para explorar e xogar; e mesmo poden utilizalo nunha pantalla táctil. As persoas con discapacidade visual poden navegar usando programas como WebbIE Web Browser, que adapta calquera web para que a información que contén resulte lexible. Para usuarios con problemas cognitivos, WWAAC Web Browser é unha opción a ter moi en conta, pola súa presentación sinxela, a súa sintetizador de voz e a súa combinación de cores, entre outras posibilidades.

2. Lectores e magnificadores de pantalla

Esta clase de software axuda a utilizar equipos informáticos a persoas con discapacidade visual ou completamente cegas. Os lectores de pantalla como Windows-Eyes ou Dolphin son capaces de converter a información visual en información audible, ou mesmo de traducir a linguaxe Braille. Doutra banda, os magnificadores de pantalla como ZoomText ou iZoom adaptan o tamaño dos elementos que aparecen no noso monitor para que resulten comprensibles para o usuario. A maior parte destes programas tamén inclúen sintentizadores de voz que poden contarnos que é o que temos en pantalla.

3. Teclados virtuais

Para unha persoa con problemas de mobilidade, manexar un teclado convencional pode ser complicado ou até imposible. Unha solución é un teclado virtual, que leva as teclas á nosa pantalla para facilitar a súa identificación e uso. Hot Virtual Keyboard permítenos personalizar o aspecto do noso teclado, memoriza os nosos xestos e o noso comportamento habitual para axudarnos a teclear e tamén crea accesos directos para conducirnos aos nosos destinos frecuentes. A predición de palabras é o punto forte de Virtual Keyboard, que ofrece amplos dicionarios de castelán, catalán, inglés, francés e italiano.

4. Recoñecemento de voz

Outra forma de escribir textos ou controlar equipos informáticos é a través da voz, algo que pode lograrse a través de programas como XVoice. Hai numerosas investigacións neste ámbito que fan que as posibilidades se multipliquen a diario. Por exemplo, dous estudantes de Enxeñaría Industrial da Universidade Miguel Hernández de Elxe desenvolveron un programa que debuxa por recoñecemento de voz, tecnoloxía que planean aproveitar para moitas outras funcións.