A Confederación Española de Persoas con Discapacidade Física e Orgánica (COCEMFE), a Asociación Nacional de Axencias de Colocación (ANAC) e a Fundación Universia culminan o proxecto RedEM+ coa presentación da súa Web, unha ferramenta deseñada especificamente para facilitar o acceso das mulleres con discapacidade física e orgánica ao mercado laboral. No acto, que se celebrará o vindeiro martes 15 de setembro no Salón de plenos da Comarca do Baixo Aragón de Alcañiz (Teruel), ás 12.00 horas, debaterase sobre diferentes temas de relevancia en materia de emprego, como a realidade socio-laboral das mulleres universitarias con discapacidade en España, o papel da Rede Nacional de Axencias de Colocación na inserción laboral das mulleres con discapacidade, e analizaranse as estratexias para impulsar esta inserción contando coa experiencia dun Servizo de Integración Laboral (SIL) rural.

A Web de RedEM+ mostra as principais utilidades na procura de emprego, achegando información de interese para as usuarias, ofertas de emprego e foros de información e debate entre outras funcións, como a opción de que as candidatas suban as seus videocurriculums e potenciar mellor a súa candidatura.

O proxecto RedEM+ promove as competencias profesionais das mulleres a través de itinerarios de orientación e formación, xera unha plataforma dixital de networking activa que facilita a interacción entre as participantes e as empresas e impulsa e desenvolve procesos de intermediación laboral real baseados no compromiso das entidades empregadoras coa contratación das mulleres con discapacidade participantes no programa.

RedEM+ foi subvencionado polo Ministerio de Sanidade, Servizos Sociais e Igualdade a través do Instituto da Muller, segundo o Mecanismo Financeiro do Espazo Económico Europeo, no marco do memorándum de acordo subscrito entre o Reino de Noruega, Islandia, o Principado de Liechtenstein e o Reino de España, na liña de proxectos de Inclusión de Organizacións Sociais.

O proxecto foi froito da colaboración dalgunhas das asociacións máis representativas do país nos sectores da discapacidade e do emprego. Por unha banda, COCEMFE, que vén realizando a súa función desde 1980, é unha das organizacións máis importantes no ámbito da discapacidade. O seu obxectivo é aglutinar, fortalecer, formar e coordinar os esforzos e actividades das entidades que traballan a favor das persoas con discapacidade física e orgánica para defender os seus dereitos e mellorar a súa calidade de vida. COCEMFE representa a este colectivo ante a Administración, a empresa privada e a sociedade e congrega a máis de 1.600 organizacións en todo o país. Dentro das súas actividades a Confederación incorporou a perspectiva de xénero como eixo transversal de todas as súas actuacións, e desenvolve programas orientados especificamente ás mulleres con discapacidade.

Pola súa banda, Fundación Universia é unha entidade privada sen ánimo de lucro promovida por Universia, a maior rede universitaria do mundo, constituída por 1.345 universidades en 23 países. A Fundación constituíuse en 2005 como a única entidade do Terceiro Sector especializada no colectivo de persoas universitarias con discapacidade. A súa finalidade principal é promover a educación superior inclusiva e o acceso ao emprego cualificado para as persoas con discapacidade. Desde 2012 é Axencia de Colocación autorizada. Fundación Universia é entidade asinante do Pacto Mundial, co compromiso de cumprimento dos Principios do Pacto Mundial das Nacións Unidas.

Por último, ANAC é a primeira asociación profesional representativa do sector das axencias de colocación de ámbito nacional. Con máis de 240 entidades asociadas e representación nas 17 Comunidades Autónomas, conta co 20% do panorama total de axencias de colocación autorizadas polos Servizos Públicos de Emprego. ANAC está unida á estratexia de emprego e emprendemento novo desde outubro de 2014 e é colaboradora como entidade experta en diversos plans de traballo de Servizos de Emprego Autonómicos.