A Fundación Vodafone España, en colaboración coa Fundación da Universidade de Oviedo, lanzou a aplicación SpeedStar, un videoxogo accesible, sobre todo, para persoas con mobilidade reducida.

O xogo, desenvolvido pola empresa Wildbit, está baseado nunha carreira de coches na que o usuario debe conseguir moedas e salvar obstáculos. Aínda que se pode xogar en solitario, o sistema permite a competición con outro xogador. Desta forma, favorécese a interacción e a participación das persoas con discapacidade.

SpeedStar é gratuíto e está dispoñible para a súa descarga desde Google Play. Así mesmo, forma parte da plataforma aMiAlcance, un conxunto de aplicacións gratuítas e de código aberto que permiten que os usuarios con discapacidade poidan comunicarse coas aplicacións de Android de forma adaptada ás súas necesidades físicas e cognitivas utilizando produtos de apoio como pulsadores, joysticks e outros.

A páxina web da Fundación Vodafone España prové máis detalles sobre esta ferramenta.