O Foro Europeo da Discapacidade (EDF), co apoio do Comité Español de Representantes de Persoas con Discapacidade (CERMI), subliñou, unha vez máis, a importancia de apostar por unha Directiva relativa á accesibilidade dos sitios web dos organismos públicos, a cal se debateu na reunión de ministros da UE no Consello de Telecomunicacións do pasado venres.

Tras a presentación do último informe sobre o desenvolvemento desta iniciativa,  emitido pola Presidencia de Letonia, EDF lamenta profundamente o novo enfoque adoptado polos Estados membros, xa que podería dar lugar á adopción dunha lexislación da UE que non traería ningún cambio substancial á accesibilidade e a inclusión para os 80 millóns de europeos con discapacidade.

De acordo cos debates actuais no Consello, os Estados membros están a discutir actualmente a posibilidade de excluír do ámbito de aplicación da Directiva non só os tipos de sitios web públicos e sitios web que prestan servizos de interese xeral, senón tamén a algúns tipos de contido dos mesmos, tales como audio, vídeo e documentos non dixitais.

Isto daría lugar a que algúns sitios web públicos sexan accesibles superficialmente, pero non os documentos que os usuarios descargan para encher formularios, obter máis información, etc. É por iso que EDF e o CERMI instan a os ministros da UE a apoiar esta Directiva en liña co espírito e obrigacións da Convención da ONU sobre os Dereitos das Persoas con Discapacidade, e a posición adoptada por unha gran maioría no Parlamento Europeo en febreiro 2014.