As empresas Vennova, 480interactive e AticSoft, con sede no Parque Científico, Tecnolóxico e Empresarial da Universidade Jaume I de Castelló  crearon a aplicación para móbiles e tabletas Guía de Selectividade 2015.

Nun só mes, esta app alcanzou as 7.000 descargas (4.000 en dispositivos Android e 3.000 en iOS), situándose como un referente para os estudantes que se van a presentar ás probas de acceso á universidade durante este mes de xuño en toda España. De feito, durante a primeira semana de lanzamento chegou a situarse no top 10 de apps educativas gratuítas en Google Play (chegou a estar a primeira) e App Store (onde alcanzou o terceiro posto), en ambos os casos cunha excelente valoración por parte dos usuarios.

Segundo os seus creadores, Guía de Selectividade 2015, vinculada ao portal LoQueQuieroEstudiar.es, "ofrece respostas prácticas ás principais inquietudes dos estudantes que se van a examinar, a través desta app interactiva para móbiles e tabletas, a primeira publicada con eses contidos específicos en España".

O desenvolvemento inclúe consellos e información seleccionada para afrontar con garantías as probas, axudar a elixir o grao, a universidade e orientar o futuro profesional.

Notas de corte das titulacións

A app preséntase en formato quiosco e inclúe un buscador de graos por profesionais e de saídas laborais por graos en todas as universidades públicas e privadas de España, baseado nos datos oficiais do Ministerio de Educación.

Os resultados da procura inclúen as notas de corte das titulacións nas distintas universidades. Entre os contidos máis consultados atópanse a clasificación das 20 titulacións máis demandadas, os 10 pasos para organizarse antes da selectividade, como combater os nervios antes, durante e despois dos exames ou o buscador de bolsas para 2015.

Os contidos da aplicación foron seleccionados e redactados por xornalistas profesionais, con experiencia en medios de comunicación e como docentes na universidade.