A Fundación Vodafone España estará presente no Mobile World Congress que se celebra en Barcelona do 2 ao 5 de marzo de 2015. Durante a feira, na caseta 6B30 situado no Hall 6 de Fira Gran Vía, presentaranse diferentes proxectos baseados nas plataformas Mefacilyta e aMiAlcance. A Fundación Vodafone España desenvolveu estas plataformas para promover solucións accesibles e innovadoras a través do uso das TIC que permiten, entre outros, servizos de rehabilitación personalizados ou goce do lecer para todos (televisión, videoxogos, etc...).

Os proxectos que presenta a Fundación son os seguintes:

Mefacilyta Rehabilitation
Esta solución, desenvolvida pola Fundación Vodafone coa colaboración do Hospital Vall d´Hebron, axuda a mellorar a situación dos pacientes de ictus durante a fase de rehabilitación no seu domicilio. Permite que o médico envíe en formato multimedia (texto, foto e/ou vídeo) os exercicios de rehabilitación de maneira personalizada, aos que accede o paciente na súa casa cando comeza unha sesión. O médico pode supervisar a súa evolución cos vídeos que recibe, gravados durante a realización dos exercicios realizados polo paciente.

A solución está baseada nunha aplicación en tablet, ou se o prefire o paciente, no seu televisor convencional conectado a Android PC e unha cámara web. A tablet ou televisor serve de espello para o paciente mentres é gravado e os médicos, a través dun portal web, poden realizar o seguimento de cada un e levar a xestión do servizo. A solución incorpora ademais un sistema para a xeración de informes sobre a evolución dos pacientes.

O sistema está baseado na plataforma 'Mefacilyta', desenvolvida pola Fundación Vodafone España, que ofrece unha contorna web e un conxunto de aplicacións para dispositivos móbiles personalizables e fáciles de usar. A solución adaptouse aos requirimentos e necesidades transmitidos polos médicos implicados na rehabilitación de pacientes despois do ictus.

O proxecto acaba de terminar a primeira fase de desenvolvemento e agora comeza a validación da solución por parte dos profesionais do Hospital Vall d´Hebron e os seus pacientes.

Plataforma aMiAlcance
A plataforma aMiAlcance, desenvolvida pola Fundación Vodafone España, comprende unha serie de aplicacións gratuítas e de código aberto que permiten que os usuarios se comuniquen coas aplicacións máis estendidas en Android, dunha forma adaptada ás súas necesidades de accesibilidade física e cognitiva. As solucións baseadas nesta plataforma están a ser definidas e validadas co apoio da Confederación ASPACE dentro do programa ASPACEnet. Durante o MWC 2015 móstranse as seguintes:

• aMiAlcance Television. Facilita o acceso á televisión a persoas con discapacidade que non poden manexar un mando a distancia, para que con solucións de hardware (por exemplo pulsadores), e a plataforma aMiAlcance poidan navegar e elixir a canle que queren visualizar. Os usuarios poden ver a televisión a través da aplicación móbil de Ono TV nun teléfono, tableta ou televisor conectado a Android PC.
• aMiAlcance Games. Existe un gran colectivo de persoas con falta de destreza manual que non poden acceder a aplicacións de entretemento. aMiAlcance Games é unha solución que facilita o seu acceso a aplicacións de videoxogos, grazas ao uso dos seus produtos de apoio. Este videoxogo, que se espera que sexa o primeiro de moitos, baséase nunha carreira de coches na que o usuario debe conseguir moedas e salvar obstáculos. Ademais, permite a posibilidade de competir con outro xogador, o que favorece a interacción e a participación social. O videoxogo foi desenvolvido pola empresa Wildbit dentro do marco da Cátedra Fundación Vodafone España da Universidade de Oviedo. Este desenvolvemento inclúe ademais a opción de rexistrar os parámetros de uso por parte do usuario e estudar así a súa evolución.
• aMiAlcance Future Interfaces. Este proxecto de investigación está dirixido a persoas con grandes limitacións físicas como tetraplexia e ELA, que non teñen a capacidade de manexar produtos de apoio convencionais (pulsadores) e de baixo custo. 

Para esta solución, mídese a actividade cerebral e procésase o sinal xerado, co obxectivo de interaccionar coa contorna da forma desexada polo usuario. A interacción BCI (Brain Computer Interface) permite realizar actividades cotiás, como acender e apagar a luz da casa, mediante ondas cerebrais.

Durante o MWC, mostrarase o cambio de luz dunha lámpada dependendo do grao de concentración da persoa portadora da diadema BCI. Esta solución, integrada na plataforma aMiAlcance permitirá no curto e medio prazo ampliar as posibilidades de uso de terminais móbiles e tabletas por parte de usuarios con gran discapacidade motora.