A Fundación ONCE e o Centro Nacional de Tecnoloxías da Accesibilidade renovaron o acordo para colaborar na mellora da accesibilidade de contornas, ferramentas e servizos asociados ás Tecnoloxías da Información e a Comunicación.

Para iso, desenvolverán accións conxuntas tanto para mellorar o acceso e promover as tecnoloxías de accesibilidade como para difundir lexislación universal e accesible no ámbito tecnolóxico, así como favorecer a inclusión na Sociedade da Información, as Redes Sociais e as Cidades Intelixentes, segundo explicaron.

Neste sentido, os responsables de ambas as entidades remarcaron a necesidade de "establecer puntos de encontro" entre as institucións españolas públicas e privadas, a industria, os operadores de servizos, os usuarios e os representantes do movemento asociativo de persoas con discapacidade.

Por esta razón, indicaron que traballarán para impulsar unha mellora do actual marco lexislativo, no que se refira ao ámbito tecnolóxico e a accesibilidade universal, para incluír novas propostas legais e normativas, criterios nas licitacións e compras tecnolóxicas, implementación, información e análise das tecnoloxías emerxentes.

Con todo iso, pretenden contribuír a evitar os elementos de "discriminación" que "impiden ás persoas con discapacidade o acceso á información, interacción, oportunidades de emprego e lecer no pleno exercicio dos seus dereitos", segundo indicaron.