A Universidade de Salamanca presentou varios proxectos tecnolóxicos vinculados co medicamento que están a ser desenvolvidos polos grupos de investigación BISITE e VisualMed System. Realizar probas médicas a distancia, mellora-la vida dos pacientes ou facilita-la formación e o traballo dos especialistas son algúns dos avances que se poden lograr mediante estes desenvolvementos tecnolóxicos.

Juan Antonio Juanes, profesor do Departamento de Anatomía Humana e director do grupo de investigación VisualMed System, que traballa con sistemas de visualización médica avanzada, explicou as posibilidades que ofrece a reconstrución en 3D de imaxes radiológicas de anatomía, de maneira que se poidan ver en calquera posición espacial. Este tipo de proxectos, axuda á formación médica, pero no campo da cirurxía contar con estruturas anatómicas en 3D tamén permite, por exemplo, "valorar cales son as mellores vías de abordaxe cirúrxica".

Neste mesmo sentido, o grupo VisualMed System tamén presentou unha contorna virtual para realizar anestesia rexional simulada mediante imaxes ecográficas, unha ferramenta moi útil para a formación neste campo.

Por outra banda, o grupo de investigación BISITE, vinculado ao Departamento de Informática e Automática e dirixido por Juan Manuel Corchado, presentou tamén diversas iniciativas, entre elas, o proxecto Azteca, que busca a accesibilidade para persoas discapacitadas en contornas laborais, de maneira que se poidan integrar, por exemplo, en oficinas.

Ademais, nesta Xornada sobre Tecnoloxía e Medicamento, que tivo lugar na Facultade de Medicina da institución académica salmantina presentaron diversos prototipos tecnolóxicos máis directamente relacionados co mundo do medicamento e a discapacidade. Un deles é "un casco que recolle as ondas do cerebro, interprétaas e permite controlar unha cadeira de rodas", sinalou Daniel Hernández, membro de BISITE.

Electrocardiograma a distancia
Ademais, o grupo traballa tamén en diversos dispositivos de baixo custo que abren a posibilidade de realizar probas médicas a distancia coas mesmas garantías que na actualidade levan a cabo en centros médicos e hospitais. Desta forma, un usuario podería conectarse a internet e enviarlle ao médico diversas probas que se pode realizar el mesmo en casa a través dos dispositivos que están a desenvolver os investigadores salmantinos. Medi-la presión arterial e o osíxeno en sangue ou realizar un electrocardiograma son algunhas das posibilidades.

"A idea é desenvolver dispositivos que poidan substituír aos actuais reducindo os custos ao máximo utilizando código libre e hardware libre", comenta Daniel Hernández. Así, o dispositivo que realiza electrocardiogramas "xa ten valoracións moi positivas", asegura, porque se asemella bastante aos resultados rexistrados nas probas hospitalarias. Na mesma liña, outro dos proxectos presentados esta tarde foi o control automático da retina co fondo de ollo.

Na actualidade, estes desenvolvementos atópanse en fase de investigación e, antes de pasar á súa comercialización por parte das empresas, terán que pasar estritos controis médicos que certifiquen a súa validez.