Un novo sistema protésico deseñado por expertos da Universidade Case Western Reserve e o Centro Médico Louis Stokes Cleveland Veterans Affairs permite aos pacientes que perderon un membro experimentar sensacións similares ás que terían se aínda o conservasen. Deste xeito, por exemplo, a unha persoa á que lle falte unha man encrecharíaselle o pelo do brazo cando "tocase" cos seus dedos biónicos algunha superficie que no seu día lle provocase denteira.

Segundo recolle a revista Science Translational Medicine, aínda que en realidade o afectado non pode "sentir" de verdade coa súa man artificial, un programa informático traduce ese rozamento en sinais eléctricos que logo envía á parte non danada do seu membro e ao seu cerebro. Para iso, implantan eléctrodos nos músculos que aínda conserva. Os seus desarrolladores destacan que este avance fai que os usuarios de determinadas próteses as poidan manexar máis facilmente.

O enxeñeiro biomecánico Dustin Tyler, que dirixiu a investigación, apunta que o seu obxectivo non só é restaurar a funcionalidade perdida do paciente, senón reconectalo co mundo. "O noso traballo serve para reactivar áreas do cerebro relacionadas coa sensación do tacto que desaparecen cando se perde un membro", indica.