Os desenvolvementos de eLABORO continúan a facilitar o achegamento dos cidadáns aos seus concellos a través do móbil, e agora preséntase en sociedade a ferramenta City4boqueixon, que facilita que os veciños de Boqueixón poidan instalar nos seus móbiles con Android unha aplicación que permite comunicar incidencias á Administración local, o que facilita a súa solución e permite tamén facer un seguimento por parte dos responsables locais e dos cidadáns preocupados.

Unha vez descargada a aplicación, un usuario só ten que indicar o tipo de incidencia (segundo afecte aos servizos e espazos municipais, como auga, rede de sumidoiros, mobiliario urbano ou espazos verdes) e a súa localización, para que a información sexa derivada ás persoas responsables de resolver o problema, recibindo o usuario unha mensaxe confirmando tanto a notificación da incidencia como a súa solución (cando se execute).

City4boqueixon tamén permitirá recibir avisos urxentes do Concello, nos que a inmediatez é crucial, como casos de persoas perdidas, temporais, desprendementos en estradas, cortes de auga e outros. O sistema de avisos á poboación é unha mellora da aplicación que se desenvolverá ao longo do ano para potenciar a interacción cos veciños.

A nova ferramenta móbil tamén permite consultar as novas relacionadas coa actividade municipal, de xeito que pode empregarse para saber de cursos, actividades municipais, ofertas de emprego ou viaxes organizadas.