A compañía británica OwnFone presentou unha gama de teléfonos con pantalla e botóns en braille, pensados para persoas con problemas de visión. OwnFone utiliza impresoras 3D para permitir personalizar os teléfonos, ampliando a súa variedade e optimizando os custos.

As impresoras 3D están a gañar protagonismo segundo se dan a coñecer as súas posibilidades. Utilizáronse impresoras 3D para xerar próteses médicas a prezos moi inferiores aos rexistrados con anterioridade. Tamén se proxectou a construción de edificios coas impresoras 3D como principal ferramenta. Seguindo esa senda, a compañía OwnFone decidiu aplicar esa tecnoloxía de produción 3D a outro ámbito máis.

OwnFone deseñou un sistema que permite aos usuarios crear o seu teléfono móbil personalizado. Investigando aplicacións e posibilidades dese sistema, o equipo de OwnFone creou teléfonos móbiles cuxa pantalla está composta por botóns en braille. Así, as persoas con problemas na súa visión poderán aproveitarse deste tipo de teléfonos.

Segundo a BBC, grazas ás posibilidades de personalización que facilita a impresión 3D, os usuarios poden seleccionar os botóns e o seu contido no teléfono. Deste xeito, as persoas con problemas de visión poden seleccionar as palabras ou nomes en braille que queren que se integren no seu dispositivo.

Os OwnFone con teclado braille están dispoñibles en Reino Unido por 60 pounds (73,6 euros). Polo momento a compañía non se pronunciou sobre a chegada dos seus produtos a outros mercados.