O proxecto europeo de I+D+i SAAPHO (Secure Active Aging: Participation and Health for the Old), liderado polo centro tecnolóxico Barcelona Dixital, desenvolveu unha ferramenta dixital para as persoas maiores que as axudará a monitorizar a súa saúde, a seguridade do seu fogar e a evitar a exclusión social por medio das tecnoloxías dixitais. O obxectivo final do proxecto é mellorar a calidade de vida e a autonomía das persoas maiores. A partir desta semana o prototipo será probado por primeira vez por máis de 40 persoas en Barcelona, no Institut de l'Envelliment, e na Asociación de Pensionistas de Eslovenia (ZDUS).

A plataforma desenvolvida no marco do proxecto permite, mediante unha tablet, acceder a servizos e ferramentas simplificadas para a xente maior e adaptadas ás súas necesidades. Por exemplo, para axudar á terceira idade a previr problemas de saúde, a ferramenta permite seguir indicadores críticos como a presión arterial, monitorizar a actividade física, e consultar o histórico de datos de saúde do paciente, entre outros servizos.

Igualmente, a aplicación permite incrementar a seguridade no fogar destas persoas, xa que está conectada con sensores do fogar, que controlan parámetros como gas, lume, CO2, temperatura, presenza, etc. e deste xeito, sempre mediante a tablet, pódese avisar e asistir ao usuario en caso de emerxencia. 

Finalmente, a plataforma conta con ferramentas de participación social, para promover unha maior interacción das persoas maiores con amigos e familiares mediante redes sociais e servizos de correo simplificados e cun deseño máis usable, que lles permitan compartir fotos, mensaxes ou escribir correos electrónicos, entre outras cousas, dun xeito sinxelo e doado.

Deste xeito, o proxecto segue os tres eixes - saúde, seguridade e participación - da política "Envellecemento Activo" impulsada pola Organización Mundial da Saúde (OMS).

Consorcio

O coordinador do proxecto é Barcelona Dixital Centro Tecnolóxico. O consorcio está formado tamén por Fraunhofer IZM (Alemaña), Technosite (España), Skai (Alemaña), ZDUS (Eslovenia), Liquid Media (Suecia), a universidade de Örebro (Suecia) e o Institut de l'Envelliment da Universidade Autónoma de Barcelona (España). O proxecto está promovido pola Comisión Europea dentro do Ambient Assisted Living Joint Programme e ten unha duración de 3 anos, finalizando en 2014.

O consorcio de SAAPHO, e especialmente as empresas, traballa para conseguir as alianzas con empresas do sector da saúde e atención á xente maior para comercializar a ferramenta resultante.