Acordo a nivel europeo para a aprobación da directiva de accesibilidade dos sitios web e aplicaciones móbiles do sector público

Os negociadores do Parlamento Europeo, o Consello e a Comisión aprobaron o 3 de maio as primeiras normas a nivel da UE para aumentar a accesibilidade dos sitios web e as aplicacións móbiles dos organismos do sector público, especialmente para as persoas cegas, xordas ou con dificultades auditivas.

Internet converteuse nun medio esencial para acceder ou permitir o acceso a información e servizos. Por iso, é máis necesario que nunca garantir que todo o mundo poida comprender e manexar sitios web e aplicacións móbiles, así como interactuar adecuadamente cos mesmos.

Na UE existen unhas oitenta millóns de persoas con algún tipo de discapacidade. A medida que envelleza a súa poboación, a cifra aumentará até alcanzar os 120 millóns en 2020. É preciso establecer un enfoque común que garanta a accesibilidade á rede, o que contribuiría á consecución dunha sociedade dixital integradora e ao despregamento dos efectos benéficos do Mercado único dixital [3] en beneficio de todos os cidadáns europeos.

A Directiva cubrirá tódolos sitios web e aplicacións móbiles do sector público, desde os das administracións, tribunais e servizos de policía aos dos hospitais, universidades e bibliotecas públicas, e fará que sexan accesibles a tódolos cidadáns, en particular aos cegos, os xordos ou as persoas con dificultades auditivas, visuais ou funcionais.

O texto acordado da Directiva:

• Cobre todos os sitios web, os seus contidos e as aplicacións móbiles dos organismos do sector público, cun escaso número de excepcións (como os organismos de radiodifusión e o streaming en vivo).
• Tamén cobre as extranets e intranets que se puliquen ou se renoven substancialmente despois da entrada en vigor da directiva.
• Exclúense algúns tipos de contidos antigos (documentos ofimáticos, multimedia, arquivos) a condición de que non se necesiten actualmente en procedementos administrativos. Ademais contempla un mecanismo de solicitude baixo demanda en caso de contidos non accesibles.
• Establece un mecanismo de feedback para notificar problemas existentes podendo escalalo en caso de non ser atendido.
• Require un seguimento e unha presentación de informes por parte dos Estados membros acerca da accesibilidade destes sitios web e aplicacións móbiles. Os informes deben presentarse á Comisión e ser obxecto de publicación.
• Esixe aos estados membros a designación dos organismos encargados de defender o cumprimento desta directiva e realizar as tarefas de monitorización e reporte.
• Referencia as normas técnicas de aplicación en liña con UNE-EN 301 549. En contorna web isto tradúcese en WCAG 2.0 (ou o seu equivalente en ámbito español UNE 139803:2012). Estas normas será necesario complementalas cunhas CTS (common technical specifications) para cubrir ao completo o campo das aplicacións móbiles.

Próximos pasos
Tra-lo acordo político provisional alcanzado a noite do 3 de maio (no «triálogo» de negociación entre o Parlamento Europeo, o Consello e a Comisión), o texto deberá ser formalmente aprobado polo Parlamento Europeo e polo Consello a través do COREPER (Council Committee of Permanent Representatives). A continuación publicarase no Diario Oficial [4] e entrará en vigor de forma oficial. Os Estados membros disporán de vinte e un meses para transpor o texto na súa lexislación nacional.

As normas establecidas entrarán en vigor para os portais novos 12 meses despois da trasposición, para o resto de portais 24 meses despois da trasposición e para as aplicacións móbiles 33 meses despois da trasposición.