O CPEIG e Igualdade entregan en Dodro 21 diplomas ás participantes en Rede Emprende

Este martes entregáronse os diplomas de asistencia ás xornadas da Rede Emprende en Igualdade en Dodro (A Coruña). Foron un total de 21 alumnas as participantes. Na cita concorreron o presidente do Colexio Profesional de Enxeñaría Informática de Galicia, Fernando Suárez, e máis a secretaria xeral de Igualdade, Susana López Abella, que salientou que a Rede Emprende en Igualdade ten como obxectivo “mellorar as capacidades de emprendemento e busca de emprego feminino a través do fomento e coñecemento das competencias e formación tecnolóxica e as redes sociais”. En total, fixo saber que esta edición das xornadas formará a unhas 180 alumnas.

No acto tamén estiveron presentes o alcalde de Dodro, Valentín Alfonsín Somoza, e a tenente de alcalde e concelleira de Servizos Sociais e Igualdade do concello, Mª Soledad Boga Grela.

Segundo fixeron saber Suárez e Abella, ás mulleres participantes nesta iniciativa (froito da colaboración do CPEIG e a Secretaría Xeral de Igualdade), proporciónaselles formación e asesoramento en cuestións como iniciación a Internet e redes sociais, novas tecnoloxías e emprendemento, procura de emprego, novas tecnoloxías como ferramentas transversais de aforro de tempo, creación de empresas e igualdade de xénero.

No presente ano 2015 púxose en marcha a terceira edición destas accións formativas en novas tecnoloxías. Para o seu desenvolvemento cóntase tamén coa colaboración da AMTEGA coa posta a disposición da súa rede de aulas CeMIT, e dos concellos onde se van a realizar os cursos, son Dodro, Ordes, Ortigueira, Palas de Rei, Vilalba, Avión, Verín, A Guarda, Marín e Vila de Cruces. Os cursos teñen unha duración de 20 horas, cun máximo de 25 alumnas. Veñen da man de profesionais do CPEIG, e celebraranse nas aulas CeMIT existentes nos correspondentes concellos.