O Programa de Voluntariado Dixital da Xunta abre a convocatoria para colaborar na primeira mini maker faire galega

O Programa de Voluntariado dixital da Xunta, impulsado pola Axencia para a Modernización Tecnolóxica de Galicia (Amtega) e a Dirección Xeral de Voluntariado,  vén de abrir unha a convocatoria para a inscrición de 15 voluntarios e voluntarias dixitais, que ofrezan o seu tempo para colaborar no desenvolvemento da Compostela Mini Maker Faire.

Trátase da primeira Maker Faire galega, que terá lugar o vindeiro 17 de outubro en Área Central, un evento que une tecnoloxía, educación, ciencia, arte, artesanía, enxeñería, sustentabilidade e moito máis. Mini Maker Faire ofrecerá a oportunidade de coñecer persoalmente aos Makers creadores desas ideas, facerlles preguntas, e sobre todo ver como a artesanía, a arte,...  e a tecnoloxía traballan xuntos.

Inscrición
Así, persoas voluntarias con curiosidade, creatividade e ganas de axudar,  apoiarán este evento dando soporte en talleres, mesas redondas, aos expositores e outras actividades que se desenvolvan no marco desta feira.
Se estás interesado en colaborar como voluntario na Compostela Mini Maker Faire rexístrate en Voluntariado Dixital e apoia este evento.

Sobre Maker Faire
Maker Faire é o festival de tecnoloxías creativas, un evento para todos os públicos, no que descubrir de forma activa inventos, creacións realizados polos propios participantes coa axuda da tecnoloxía. É un lugar no que a xente mostra o que está a facer e comparte as súas aprendizaxes. Tamén é unha celebración do movemento Maker a nivel mundial.

A primeira Maker Faire celebrouse San Mateo, California. No ano 2013 realizouse o oitavo encontro con máis de 900 makers e 120.000 asistentes. A outra gran feira, a World Maker Faire New York, creceu en catro anos ata chegar ata máis de 600 makers e 75.000 asistentes. Detroit, Kansas City, Newcastle (UK), Rome, Oslo e Tokyo albergaron as outras feiras con máis de 200 makers en cada unha delas. As Mini Maker Faire, organizadas pola comunidade de forma independente foron crecendo pouco e pouco e xa se celebran en todo o mundo, e agora en Galicia.

O Movemento Maker
O movemento maker parte da cultura de facer as cousas un mesmo coa axuda da tecnoloxía e de coñecementos compartidos a través de redes sociais e internet. É unha mestura do DIY (Do it Yourself - Faino ti Mesmo) coa tecnoloxía para lograr proxectos ata agora restrinxidos a unha elaboración industrial.

O perfil dos Makers abrangue desde entusiastas tecnolóxicos a artesáns, educadores, inventores, afeccionados, enxeñeiros, artistas, clubs de ciencia, estudantes, autores e exhibidores comerciais... ademais de realizar os seus proxectos, compártenos online con Makers de todo o mundo.

Programa de Voluntariado Dixital
Esta iniciativa, posta en marcha en febreiro de 2011 pola Axencia para a Modernización Tecnolóxica de Galicia e a Dirección Xeral de Xuventude e Voluntariado, ten como obxectivo achegar as novas tecnoloxías a unha maior porcentaxe da poboación, favorecendo a inclusión dixital de toda a cidadanía, especialmente entre os colectivos de persoas maiores e de persoas con discapacidade.

A iniciativa suma a solidariedade individual, a responsabilidade social das empresas do ámbito tecnolóxico, a colaboración das asociacións sen ánimo de lucro e o aproveitamento das infraestruturas públicas.