Benestar colabora coa USC no desenvolvemento de actuacións de voluntariado dirixidas ás persoas maiores

A Consellería de Traballo e Benestar colaborará coa Universidade de Santiago de Compostela no desenvolvemento dun programa de voluntariado dirixido ás persoas maiores coa finalidade de potenciar a súa participación social como un piar do seu envellecemento activo.

En concreto, asinou un convenio de colaboración que contempla tres actuacións. A primeira consistirá na prospección entre entidades de iniciativa social para facilitar unha relación das que están realizando ou poidan realizar actuacións de voluntariado dirixidas a persoas maiores. Tamén facilitarán unha relación de potenciais destinatarios de ditas actuacións.

Cruzaranse datos co obxectivo de poder identificar que entidades están traballando nestes ámbitos e tamén se solicitará información aos concellos galegos e aos centros sociocomunitarios para que poidan identificar nos seus ámbitos territoriais experiencias neste eido.

En segundo lugar, elaborarase unha guía para a promoción desta iniciativa na que se incluirán, entre outros, os seguintes módulos: envellecemento activo como marco de referencia; e características persoais, organizacionais e das tarefas de voluntariado para a participación voluntaria exitosa.

A guía pretende potenciar o papel das persoas maiores como axentes activos, é dicir, non só como receptoras ou beneficiarias do servizo de voluntariado, senón como prestadoras, de xeito que, unha vez finalizada a súa vida laboral, poidan desenvolver tarefas que lles permitan seguir tendo unha vida diaria con actividade.

Será tamén unha ferramenta que se porá a disposición das entidades para que poidan levar a cabo programas de información e divulgación sobre o voluntariado, no que poderá colaborar a Consellería de Traballo e Benestar cara a acadar unha incorporación cada vez maior de persoas voluntarias a estes programas.

Por último, facilitaranse directrices e recomendacións que permitan establecer as bases para o deseño dun banco de voluntariado a favor das persoas maiores, con ubicación na plataforma web da Dirección Xeral de Xuventude e Voluntariado.