Cando saímos da cidade ou do país hai unha cuestión fundamental que sempre, ou case sempre, non planificamos: que faremos ou a quen acudiremos en caso de necesitar asistencia médica. No caso de que a nosa saúde se resinta cando esteamos de viaxe, a 'app' gratuíta Doctoralia, dispoñible para Android e iOS, ofrécenos a posibilidade de atopar ao doutor máis próximo simplemente descargándoa no noso smartphone.

A aplicación permite xeolocalizar ao especialista que necesitemos, contactar con el e concertar unha cita se é necesario. Con Doctoralia poderemos establecer contacto cos médicos de Europa, Rusia, India, Australia e os principais destinos vacacionais de América (como Chile, Colombia, Arxentina ou Perú). Na base de datos da ferramenta atópase rexistrada a información duns 3,5 millóns de especialistas e centros.

Doctoralia foi galardoada co premio de 'AppCircus' á mellor aplicación móbil relacionada coa saúde e benestar, nun concurso celebrado en Düsseldorf (Alemaña). Tamén foi a primeira aplicación de saúde non inglesa que entrou a formar parte do NHS Health Apps Library, o directorio de aplicacións médicas do servizo sanitario público británico.