Google investirá 50 millóns de dólares (36,8 millóns de euros) nun programa para animar as mulleres a que se dediquen ao mundo da programación e o desenvolvemento de tecnoloxías, segundo anunciou a compañía no seu blog.

Apenas unhas semanas despois de lanzar o seu primeiro informe sobre a diversidade do seu equipo, os de Mountain View queren conseguir que máis mulleres entren na informática.

Para lograr o seu obxectivo lanzou o seu programa 'Made with Code' no que participarán asociacións xuvenís e contará con varios proxectos de codificación. Google cre que deste modo pode axudar a que máis mulleres se interesen polo campo da codificación.

"Hoxe en día a programación non é só unha habilidade útil para traballar nunha empresa de tecnoloxía, a enxeñaría non é só para os enxeñeiros de deseño de interiores. Medicina, arquitectura, música, non importa o que unha rapaza queira facer, aprender a programar axudaralles a conseguir o seu obxectivo futuro", sinalou a CEO de YouTube, Susan Wojcicki. "O seu futuro -o noso futuro- está feito con código".

Fai pouco Google publicou un informe onde desvelaba a composición do seu equipo, formado por 44.000 empregados. A compañía destacou que o 70 por cento da súa forza de traballo en todo o mundo está composta por homes, e o 61 por cento son brancos. Só o 3 por cento é de orixe hispana, o 2 por cento é de raza negra e o 30 por cento son mulleres.

"Google non está onde quereriamos estar no tema da diversidade e é difícil levar a cabo estes desafíos se non estás preparado para tratalos de forma aberta e con feitos" apuntaba o vicepresidente sénior de Google, Laszlo Bock, no blog da compañía.

Dende 2010 Google doou máis de 40 millóns de dólares a organizacións que ensinan informática a mulleres e nenas e traballou con "universidades historicamente negras". Agora hai que sumar a estas iniciativas o seu programa 'Made with Code', no que se gastará 50 millóns de dólares.