A Fundación Vodafone España convoca a XIII Edición dos "Premios Vodafone á Innovación"

• Outorgaranse tres premios dotados con 15.000 euros cada un
• O prazo de presentación de candidaturas finaliza o 21 de xullo de 2019

A Fundación Vodafone España convoca a XIII Edición dos seus "Premios Vodafone á Innovación" co obxectivo de promover e desenvolver proxectos de innovación en TIC para mellorar a calidade de vida de sectores da poboación que se atopen nunha situación de vulnerabilidade ou nunha posición de risco de caer na exclusión social.

A finalidade da convocatoria é a de apoiar a aparición de servizos innovadores, especialmente dirixidos ao beneficio dos devanditos grupos, que poidan ter unha ampla repercusión polo seu interese, novidade e potencialidade na promoción da transformación dixital, así como a súa contribución aos Obxectivos de Desenvolvemento Sustentable (ODS) de Nacións Unidas.

Os premios clasificaranse nas seguintes categorías:

• Premios "Connecting for Good": outorgaranse dous premios "Connecting for Good" aos proxectos tecnolóxicos innovadores que supoñan unha solución ante un reto ou problema de amplo impacto social, sustentable, e para calquera ámbito: educación, emprego, saúde, participación cidadá, etc. En ambos os proxectos teranse en conta os criterios de accesibilidade (deseño para todos) e apoio á transformación dixital.

Poderanse presentar proxectos de innovación tecnolóxica desenvolvidos en calquera soporte (app, web, plataforma...). Terán que terminar a súa fase de definición e estar listos para comezar a súa fase de execución, ou comezala xa na data de entrega.  

• Premio á Traxectoria no uso das TIC: esta categoría supón un recoñecemento especial a persoas, entidades ou institucións públicas ou privadas que utilizasen a tecnoloxía en proxectos de gran impacto social. Os candidatos serán propostos exclusivamente pola Fundación Vodafone e/ou polo xurado destes premios.

Cada un dos premios están dotados con 15.000 euros e unha escultura conmemorativa.

Ademais, a categoría "Connecting for Good" será premiada con presenza no Mobile World Congress 2020.

A estes premios poden presentarse proxectos desenvolvidos en España desde o ano 2017 e ata a data da convocatoria e que non fosen premiados noutras convocatorias da Fundación Vodafone España.

O prazo para a presentación de proxectos estará aberto ata o 21 de xullo de 2019.

Bases desta edición, formulario para presentar candidaturas e instrucións. [3]

Un xurado formado por personalidades da Administración, a investigación e a empresa valorará o carácter innovador da solución, o público obxectivo que se podería ver beneficiado e a súa posible escalabilidade a outros grupos vulnerables, e a súa sustentabilidade técnica e económica.

O fallo do xurado notificarase antes do 20 de setembro de 2019.