Ategal, Cogami e Fegaus protagonizan a sesión inaugural da nova fase do Proxecto 'Simpático'

A sede central en Santiago de Compostela da Escola Galega de Administración Pública (EGAP) da Xunta de Galicia, acolleu este venres a sesión inaugural da segunda fase do proxecto europeo 'Simpático'. Nela participaron alumnos e socios e socias das Aulas Senior de Galicia (Ategal), Fegaus e Cogami.

 

En concreto, unha trintena de persoas maiores, discapacitadas ou maiores con discapacidade, realizaron unha proba piloto desta nova fase do 'Simpático' e un posterior protocolo de formación co obxectivo de mellorar o acceso á administración electrónica.

 

As probas repetiranse a próxima semana, o 8 de outubro, en Ategal Coruña e do 16 ao 18 de outubro, en Ategal Santiago de Compostela e realizaranse con e sen ferramentas específicas propias deste proxecto continental.

 

Faise así, explica a directora de Ategal, Paula Sande, 'para poder valorar e comparar a execución de cada persoa e os resultados individuais e colectivos e, desta forma, engadir ao informe e conclusións finais'.

 

O proxecto 'Simpático' desenvólveno en España, entre 2017 e 2020, Deusto Hibérica e a Xunta e a súa finalidade é achegar as administracións públicas á cidadanía a través de servizos online amigables (e-administration).

 

En Galicia, Ategal, Cogami e Fegaus son as entidades coas que a Xunta de Galicia mantén un convenio de colaboración para a realización das súas actividades. As tres serán as responsables de testar os resultados e impactos das ferramentas desenvolvidas no marco do proxecto a través da réplica do programa de benestar en balnearios e a orde de axudas individuais para a adquisición de servizos de promoción da autonomía persoal e a adquisición de servizos complementarios de asistencia persoal, para persoas con discapacidade.

 

No consorcio participan á súa vez as Universidades de Sheffield e Deusto, a Fundación Bruno Kessler e as enxeñerías HI Iberia, Sparta Dixital e Business Engineering.