As persoas con parálise cerebral toman o Twitter coa campaña #MiraDeFrente

Este 6 de outubro celébrase a nivel mundial o Día da Parálise Cerebral, e as entidades e organizacións que levan anos traballando polas mellores condicións posíbeis de vida para as persoas afectadas por esta doenza, están a pechar fileiras na Rede para conmemoralo e mostrar as grandes necesidades sociais do colectivo. Asemade, búscase poñer o foco na súa sexualidade e na súa intimidade. Con este motivo o movemento ASPACE [3] puxo en marcha unha campaña, Non mires a outro lado, que se desenvolve no Twitter baixo o cancelo #MiraDeFrente, sendo o día de hoxe o punto álxido da campaña. O obxectivo dos colectivos estatais e tamén galegos é que o fío chegue este mércores a ser trending topic a nivel nacional entre as 12:00 e as 12:30 horas. 

Amais, a Federación ASPACE Galicia e as entidades que a integran sairán á rúa en Oleiros (A Coruña), Vilagarcía de Arousa, Pontevedra, Vigo e Lugo. A isto cómpre engadir o compromiso de ducias de usuarios referenciais nas redes (influencers) que xa confirmaron a súa adhesión e a súa participación na campaña. Baixo a mobilización subxace a seguinte proclama: reivindicar a sexualidade, a intimidade e afectividade destes colectivos “coma un dereito máis para vivir unha vida plena”. 

A campaña acompase da canción Non mires a outro lado do grupo Ravioli Makers, un anuncio (que está a ter difusión entre as principais televisións nacionais e autonómicas) e máis un videoclip nas redes [4] (que inclúe mensaxes reivindicativas para “eliminar ideas preconcibidas” e “concienciar á poboación sobre a importancia de normalizar a sexualidade e afectividade en parálise cerebral”).

Este mércores 3 de outubro o Movemento ASPACE fará un chamamento á cidadanía a través de redes sociais para facer viral a campaña. Amais disto, hoxe celebraranse en diferentes puntos do eido estatal varias actividades e iniciativas das 85 entidades que forman parte do Movemento. No caso galego, as asociacións membro de ASPACE-Galicia, teñen organizados os seguintes actos (sendo en todos eles un flashmob e a lectura dun manifesto as accións principais):

• Amencer - ASPACE: 12:00 horas na Praza da Peregrina (Pontevedra) e 12:00 horas na Praza de Galicia (Vilagarcía de Arousa).
• APAMP Vigo: 12:00 horas no Museo Marco, rúa do Príncipe (Vigo).
• ASPACE - A Coruña: 12:00 horas na Lagoa de Mera, Concello de Oleiros (A Coruña).
• ASPACE Lugo: 18:30 horas na Praza do Castiñeiro (Lugo). 

Ademais, o acto organizado por ASPACE-A Coruña no Concello de Oleiros contará coa presenza da nova Conselleira de Política Social da Xunta de Galicia Fabiola García Martínez.