Fundación Mutua convoca os VI Premios ao Voluntariado Universitario

A Fundación Mutua Madrileña convocou a VI edición dos Premios ao Voluntariado Universitario, unha iniciativa que busca recoñecer, promover e apoiar o labor solidario dos mozos universitarios españois. A convocatoria estará aberta ata o próximo 31 de outubro.

A esta nova edición [3] poderán concorrer iniciativas de voluntariado impulsadas por un grupo de estudantes universitarios (mínimo 3 persoas) que estean matriculados en calquera universidade española e que estean a cursar os seus estudos actualmente ou que os finalizaran hai menos de dous anos. Así mesmo, os proxectos deben estar vinculados a entidades sen ánimo de lucro e deben ser iniciativas que xa estean en curso ou que vaian poñerse en marcha antes do 31 de marzo de 2019.

A temática dos proxectos de voluntariado é libre e poderán optar todas as propostas que busquen a mellora dun colectivo, tanto dentro como fóra de España (nenos, anciáns, inmigrantes, persoas sen teito, persoas con discapacidade física ou intelectual, animais, iniciativas ambientais, etc.)

Entre todas as iniciativas presentadas, a Fundación Mutua elixirá 6 proxectos gañadores entre os que repartirá un total de 35.000 euros para axudar ao impulso e sostemento dos mesmos (10.000 euros para o gañador e 5.000 euros para os outros 5 finalistas). No proceso de valoración, o xurado terá en conta criterios cuantitativos (número de estudantes implicados e horas dedicadas, antigüidade do proxecto e continuidade prevista, número de beneficiarios, custo económico e fontes de financiamento) e cualitativos (tipo de proxecto: grao en que mellora as necesidades do colectivo beneficiario, melloras logradas desde o inicio e obxectivos previstos durante o seu desenvolvemento, organización e achega de enfoques innovadores na actividade).

As bases completas dos VI Premios ao Voluntariado Universitario están dispoñibles na páxina web dos premios [3].

83 universidades representadas na quinta edición

Á quinta edición dos Premios ao Voluntariado Universitario concorreron 92 candidaturas procedentes de 83 universidades e 91 ONG, nas que participaron preto de 2.600 estudantes voluntarios.

O primeiro premio, dotado con 10.000 euros, recaeu no proxecto “Adopta un Avó”, no que participan alumnos de distintas universidades españolas, en colaboración coa asociación  homónima. A iniciativa busca paliar a soidade de anciáns ingresados en residencias de maiores.

Accede aquí á noticia completa [4]