Feijóo avanza máis de 26 millóns para a formación de 8.700 persoas a través de 580 cursos especializados no naval, no metal e na automoción, en competencias dixitais e industria 4.0

• Resalta que se investirán 6,65 millóns na realización de 145 cursos para cualificar a 2.175 persoas sen emprego nos sectores do metal, o naval e a automoción
• Indica que a Xunta seguirá apostando por este tipo de programas formativos, xa que na edición do ano 2016, un 60% dos alumnos que se cualificaron nestes cursos acadaron un emprego
• Lembra que as accións formativas, que empezarán a partir de setembro, se estenderán ao longo de 12 meses

O presidente do Goberno galego, Alberto Núñez Feijóo, avanzou hoxe unha achega de máis de 26 millóns de euros para a formación de 8.700 persoas a través de 580 cursos especializados no naval, no metal e na automoción; na docencia de formación profesional para o emprego, e para as accións vinculadas coas competencias dixitais.

Máis polo miúdo, investiranse 6,65 millóns na realización de 145 cursos para cualificar a 2.175 persoas sen emprego nos sectores do metal, o naval e a automoción. En competencias clave, levaranse a cabo 58 cursos para cualificar a 870 persoas e, con preto de 4 millóns de euros desenvolveranse accións de formación sobre competencias dixitais para 305 desempregados.

Durante a rolda de prensa do Consello, Feijóo lembrou que nesta convocatoria, ao igual que na anterior, tamén se dará prioridade: aos cursos vinculados coa Industria 4.0; aos idiomas, coñecementos financeiros, xurídicos e ás especialidades con maior demanda ou maior inserción laboral. “Para iso, destinarase 13 millóns de euros”, dixo, incidindo en que a Xunta seguirá apostando por este tipo de programas formativos xa que na edición do ano 2016, un 60% dos alumnos que se cualificaron nestes cursos acadaron un emprego, catro puntos porcentuais máis que nos dous anos anteriores.

Cómpre recordar que as accións formativas, que empezarán a partir de setembro e se estenderán ao longo de 12 meses, enmárcanse na folla de ruta do Goberno galego en materia laboral: a Axenda 20, coa que tamén se está apoiando este ano outro tipo de programas dirixidos á cualificación para desempregados. Neste eido, destacan as unidades formativas na empresa cun compromiso mínimo de contratación do alumnado que se forme.