A Fundación Vodafone España e a Confederación Galega de Persoas con Discapacidade desenvolveron o programa “Participa coa dis-Capacidade”

• O programa no que participaron 150 persoas con discapacidade tiña como obxectivo potenciar o uso das novas tecnoloxías durante a procura de emprego

Un total de 104 persoas con discapacidade conseguen inserirse laboralmente tras participar no programa de inserción ‘Participa coa dis-Capacidade', un proxecto co que se pretendeu potenciar o uso das TICS para a inserción sociolaboral.

Este programa desenvolveuse durante o ano 2017 e finalizou en decembro cuns resultados que superaron todas as expectativas marcadas pola área de emprego de COGAMI e da Fundación Vodafone España, con respecto ao número de insercións. Ambas as entidades tiñan como obxectivo alcanzar un 49% de ocupación laboral das 150 persoas participantes no programa. O resultado final foi superado, xa que o 69% das persoas participantes están a traballar agora: 22 na Coruña, 11 en Ferrol, 9 en Lugo, 12 en Ourense, 10 en Pontevedra, 18 en Santiago e 22 en Vigo.

Todas as persoas seleccionadas para formar parte en ‘Participa coa dis-Capacidade', compartían perfís similares: todas tiñan discapacidade ou incapacidade laboral recoñecida para o desenvolvemento da súa profesión habitual, carecían dun contrato laboral durante os seis meses anteriores ao programa e todas contaban con maiores dificultades de inserción por vivir no rural, por ter formación básica e por ser muller (por iso é polo que a metade de participantes deste programa sexan mulleres). Segundo o lugar de orixe, 24 dos participantes procedían da Coruña, outras 24 de Santiago Compostela, 18 de Ferrol, 18 de Lugo, 19 de Ourense, 22 de Pontevedra e 25 estaban en Vigo.

Sete orientadores laborais, situados nas oficinas que COGAMI ten abertas nas principais cidades galegas, son os que se encargaron de valorar e avaliar as capacidades de cada unha das persoas participantes no programa e a súa motivación. Tras as entrevistas personalizadas, trazaron un itinerario o máis axustado posible aos intereses e posibilidades de cada unha das persoas.

‘Participa coa dis-Capacidade', ademais de asesoramento, tamén ofreceu información, formación e capacitación en TICS baseado en soportes, equipamentos, tecnoloxías e software adaptados, co propósito de facilitar a súa comprensión e poder darlles uso para a busca de emprego e, finalmente, poder acceder ao comprado laboral.

Tras analizar as necesidades máis demandadas polas persoas participantes, impartiron 8 cursos sobre competencias informáticas nos que participaron 65 persoas e desenvolveron 7 talleres sobre redes sociais que contaron coa asistencia de 70 persoas. Tamén se realizaron 15 círculos de emprego para compartir experiencias e impartiuse formación sobre as ferramentas ou apps que se poden descargar nun Smartphone e que facilitan a busca de emprego.

Outra das xestións realizadas, foi a posibilidade de realizar prácticas en empresas ás que asistiron 35 persoas e asesoraron na elaboración dun curriculum 2.0 ou audiovisual desde a preparación do guión ata a presentación da súa gravación.