A Amtega concede o premio Son Dixital á asociación Nuestra Señora de Chamorro pola iniciativa InnovaNarón

• A entidade, que atende a persoas con discapacidade intelectual, creou un portal de comercio electrónico e un blog para dar a coñecer os seus produtos artesanais
• Cinco veciñas de San Sadurniño reciben un accésit pola súa activa participación no proxecto Teño unha horta en San Sadurniño
• O segundo accésit foi para catro voluntarios participantes na iniciativa MiraTICarballedo

A Axencia para a Modernización Tecnolóxica de Galicia (Amtega) seleccionou como gañador da primeira edición do Premio Son Dixital o traballo realizado polos diferentes integrantes da Asociación Nuestra Señora de Chamorro, dentro da iniciativa InnovaNarón, liderada desde a aula CeMIT deste Concello, no marco do proxecto CeMIT-Innova.

A asociación Nuestra Señora de Chamorro, atende ás necesidades das persoas con discapacidade intelectual e a súa contorna familiar, e con esta vocación de servizo creou un portal de comercio electrónico (www.innovanaron.com [3]), xestionado pola propia asociación e as persoas que participan diariamente nos seus obradoiros. Ademais, a través dun blog dan a coñecer non só os produtos artesanais realizados polos seus usuarios, senón tamén as actividades que desenvolven no seu día a día.

A iniciativa combina o afán de superación, colaboración e uso da tecnoloxía, o que a converteron na primeira gañadora do Premio Son Dixital, que busca recoñecer ás persoas e entidades implicadas nas iniciativas de innovación social dixital que se desenvolven en Galicia dentro da iniciativa CeMIT-Innova posta en marcha pola Amtega.

O Premio Son Dixital

Ademais do recoñecemento, os premiados obterán tamén un dispositivo tecnolóxico, achegado pola empresa colaboradora do programa CeMIT-Innova Primux Trading, situada no parque tecnolóxico Tecnópole de San Cibrao das Viñas (Ourense).

Dous accesits ao premio

Entre as candidaturas presentadas tamén se concederon dous accésits que recaeron en:

• Cinco veciñas de San Sadurniño: Cruz Piñón, Lucía Pita, Consolo Picos, Carmen Couce e Carmen Bouza, pola súa transformación persoal e participación dentro do proxecto Teño unha horta en San Sadurniño executado ao redor da aula CeMIT deste concello.

O seu proxecto, que comezou no 2015, converteuse nun bo exemplo do empoderamento da muller da contorna rural, innovando na forma de transmitir - a través dunha canle de Youtube - o traballo e a tradición do mundo rural, que nos fan chegar a través de relatos frescos, contados en primeira persoa dunha forma didáctica e divertida. Estas cinco mulleres amosan como a tecnoloxía pode transformar unha vida dedicada á labranza e coidado da terra e aos recursos naturais, dando visibilidade e importancia ao rol desempeñado por estas mulleres labregas, que xa conseguiron case 1.000 seguidores na súa canle de Youtube.

• Sonia Moure, Daniel Diéguez, José Manuel Campos e Rocío Fernández: catro voluntarios comprometidos co proxecto MiraTICarballedo, liderado desde a Aula CeMIT do Concello de Carballedo, co que buscaron afianzar o rural como modelo de crecemento económico.

A través da experiencia e o coñecemento dos catro voluntarios, propiciouse unha rede de alianzas - entre entidades, voluntariado e persoas - que relacionan tecnoloxía, desenvolvemento da agricultura e gandería e novos formatos de emprendemento e emprego. As actividades programadas na aula CeMIT, a través de xornadas informativas sobre emprendemento rural, de titorización de proxectos innovadores e sobre aplicacións móbiles para o sector agrario, son a súa forma de brindar ao mundo rural a oportunidade de subirse ao carro da tecnoloxía e a innovación.

A Rede CeMIT

A Rede CeMIT (Rede de Centros para a Modernización e a Inclusión Tecnolóxica), impulsada pola Amtega, está integrada por 98 aulas, presentes en 92 municipios e 53 comarcas. Ou seu obxectivo é promover ou uso das novas tecnoloxías entre a poboación, con especial atención aos colectivos máis afectados pola fenda dixital, fomentar a formación dixital entre os profesionais galegos e mostrar a pemes e micropemes as vantaxes da sociedade da información.