A Xunta abre o prazo de inscrición nun curso de voluntariado de especialización

A Xunta de Galicia abre o prazo este mércores 27 para a inscrición na segunda edición do curso de voluntariado: nivel de especialización de carácter xenérico 2017, destinado preferentemente ao persoal técnico e ás persoas voluntarias das entidades inscritas no Rexistro de Acción Voluntaria da administración autonómica.

Cunha duración de 20 horas lectivas, e sen límite de prazas, esta formación en liña, impulsada pola Dirección Xeral de Xuventude, Participación e Voluntariado inclúese no plan de formación para as persoas voluntarias e os profesionais de promoción e xestión do voluntariado proposto desde Voluntariado Galego, co obxectivo de mellorar a xestión do ciclo da acción voluntaria,en termos de transparencia, eficacia e eficiencia en consonancia cos retos establecidos na Estratexia Galega de Acción Voluntaria (2016-2018).

Ao longo dos cinco módulos nos que está estruturado o curso, as persoas participantes comezarán aproximándose ao significado do que supón en termos de emocións a acción voluntaria afondando na análise das motivacións, e definición das aptitudes e actitudes das persoas voluntarias. Continuarase co estudo de habilidades sociais, coa proposta de creación de grupos de traballo e a adquisición das técnicas necesarias para resolver hipotéticas situacións de conflitos.

No 2017, por unha banda consolídase a oferta formativa da Dirección Xeral de Xuventude, Participación e Voluntariado coas segundas edicións dos cursos de formación básica en proxectos de voluntariado e de especialización con carácter xenérico máis o de voluntariado en proxectos de dinamización de envellecemento activo e saudable, respectivamente, e, por outra, incorpóranse como novidades temáticas novas accións de carácter formativo, como o de Voluntariado e continxencias mariñas e Voluntariado e riscos laborais.

Está previsto igualmente no derradeiro trimestre do ano un curso de voluntariado en catástrofes e emerxencias.

As persoas interesadas en participar neste novo curso poderán incribirse a través da páxina web de Voluntariado Galego [3].