Acceso ás Novas Tecnoloxías para familiares de persoas con Dano Cerebral Adquirido (DCA)

A Asociación de Dano Cerebral de Compostela Sarela é unha entidade sen ánimo de lucro creada en decembro  de 2000 por familiares e persoas con dano cerebral adquirido (DCA) e que desenvolve o seu labor fundamentalmente nos concellos que configuran a área sanitaria de Santiago.

Ademais, non só atendemos a persoas con DCA, senón tamén ás súas familias. Por esta razón, creamos un programa de “Atención a Familias”, onde ofrecemos apoio e actividades para mellorar o seu día a día.

Unha destas actividades é “Acceder ás novas tecnoloxías”. Os contidos son resultado de suxestións, peticións e necesidades das propias familias. Estes son:

• Crear unha conta de correo
• Envío e recepción de mensaxes
• Achegar e descargar arquivos (imaxe, texto,…)
• Procura na internet e manexo básico para navegar polas páxinas web
• Solicitar unha cita médica na páxina do SERGAS
• Solicitar unha cita para o DNI ou Pasaporte
• Acceso á plataforma E-SAÚDE
• Outros: redes sociais (facebook), manexo do Smartphone (WhatsApp)...

Esta actividade tería lugar no centro da propia entidade, os luns, de 10:00 a 11:30 da mañá. O grupo estaría formado aproximadamente por 6 familiares (cunha media de 60 anos de idade), e tamén habería outra persoa (familiar) para levar a cabo a actividade.