O FSE financiará 5 iniciativas galegas de emprego xuvenil dixital

O Ministerio de Enerxía, Turismo e Axenda Dixital, a través da entidade pública Red.es, destinará 18,36 millóns de euros a axudas para impulsar a formación e o emprego xuvenil na economía dixital das que se beneficiarán 27 entidades que desenvolverán os seus proxectos integrais de emprego en 14 comunidades autónomas. En total, mobilizarase un orzamento de 24,1 millóns de euros en actuacións de formación e inserción laboral incluíndo a achega dos beneficiarios.
O programa Profesionais Dixitais Emprego Novo (cofinanciado polo Fondo Social Europeo con cargo ao Programa Operativo de Emprego Xuvenil e enmarcado no Plan de inclusión dixital e empregabilidade da Axenda Dixital para España) diríxese a ofrecer a mozos desempregados do Sistema Nacional de Garantía Xuvenil formación orientada á industria dixital e os novos modelos de negocio, e a facilitar o seu acceso a postos de traballo que impulsen a transformación dixital das empresas.
Subvencionaranse 32 proxectos integrais de emprego para realizar 74 actuacións de formación nas diferentes comunidades autónomas, das que 5 corresponderán a Galicia.

Axudas entre 100.000 e 2.000.000 de euros por beneficiario

As axudas están dirixidas a entidades (tanto empresas como asociacións ou fundacións) que desenvolvan proxectos integrais de emprego no ámbito das TIC e a Economía Dixital en polo menos dúas comunidades autónomas. Terán un importe mínimo de 100.000 euros por proxecto e máximo de dous millóns de euros por solicitante.
Subvencionaranse proxectos de formación cun mínimo de 150 horas que ademais inclúan un compromiso de contratación de polo menos seis meses, para un mínimo do 30% dos alumnos que conclúan os programas formativos. Estes postos estarán relacionados co sector TIC e a Economía Dixital (cun máximo do 5% como traballadores autónomos).
Para as actuacións de formación, as axudas cubrirán o 91,89% dos proxectos de asociacións e fundacións, e o 60% no caso das empresas (ata o 70% se son PEME). Na modalidade de contratación, concederase un 50% dos custos salariais por contrato, cun máximo de ata 3.000 euros por mozo en contratacións por conta allea e de 1.800 para os autónomos.
Os proxectos integrais de emprego iniciarán as súas actuacións durante o último trimestre de 2017 e finalizarán en outubro de 2018.