Un mozo arxentino crea unha aplicación para facilitar a comunicación de persoas xordas

• A aplicación Fálao! traduce a voz o que o usuario xordo escribe no móbil e pasa a texto o que o seu interlocutor di, permitindo unha comunicación fluída

Esta aplicación é gratuíta e está dispoñible para teléfonos Android e non necesita que o teléfono estea conectado a Internet.

No seu deseño, o mozo arxentino de 18 anos Mateo Salvatto tivo en conta as necesidades das persoas con discapacidade auditiva, polo que a aplicación inclúe botóns con texto predefinido moi útil para facilitar o seu uso.

Por exemplo, na súa pantalla principal, ademais do botón para que o teléfono lea o que escribiu o usuario ou para gravar o que di o interlocutor, existe un acceso directo a unha explicación en voz do funcionamento da aplicación, para que a persoa que vai interactuar co xordo poida saber rapidamente o que ten que facer.

Tamén trae predefinidas algunhas mensaxes de emerxencia para pedir que se chame á policía, a unha ambulancia, aos bombeiros ou para reclamar axuda en xeral.

Así mesmo, incorpora outros textos de uso frecuente como “son xordo” e “son xorda”, “perdinme”, “sinale” e “escriba”.