A Fundación Mutua Madrileña convoca os V Premios ao Voluntariado Universitario

A Fundación Mutua Madrileña lanza este 1 de xuño a V edición dos Premios ao Voluntariado Universitario, unha iniciativa que busca recoñecer, promover e apoiar o labor solidario dos mozos universitarios españois. A convocatoria estará aberta desde o 1 de xuño ata o próximo 31 de outubro.

 

A esta nova edición poderán presentarse iniciativas de voluntariado impulsadas por un grupo de estudantes universitarios (mínimo tres persoas) que estean matriculados en calquera universidade española e que estean a cursar os seus estudos actualmente ou que os finalizaran hai menos de dous anos.

 

Así mesmo, os proxectos deben estar vinculados a entidades sen ánimo de lucro e deben ser iniciativas que xa estean en curso ou que vaian poñerse en marcha antes do 31 de marzo de 2018, segundo detallaron os seus impulsores.

 

A temática dos proxectos de voluntariado é libre e poderán optar todas as propostas que busquen a mellora dun colectivo, tanto dentro como fóra de España (nenos, anciáns, inmigrantes, persoas sen teito, persoas con discapacidade física ou intelectual, animais, iniciativas ambientais, etc).

 

A Fundación Mutua Madrileña destinará 35.000 euros ao impulso e sustentabilidade dos seis proxectos que resulten galardoados (10.000 euros para o gañador e 5.000 euros para os outros cinco proxectos finalistas).

 

O xurado terá en conta para a valoración criterios cuantitativos (número de estudantes implicados e horas dedicadas, antigüidade do proxecto e continuidade prevista, número de beneficiarios, custo económico e fontes de financiamento) e cualitativos (tipo de proxecto: grao en que mellora as necesidades do colectivo beneficiario, melloras logradas desde o inicio e obxectivos previstos durante o seu desenvolvemento, organización e achega de enfoques innovadores na actividade).

 

As bases completas dos V Premios ao Voluntariado Universitario están dispoñibles na páxina web dos premios ('www.premiosvoluntariado.com').