A Fundación Vodafone España lanza novos tutoriais formativos para maiores no uso do WhatsApp

• Estes tutoriais facilitan o uso aos maiores da mensaxería instantánea da internet máis utilizada

Co fin de continuar afianzando o uso dos dispositivos móbiles para as persoas maiores, a Fundación Vodafone España lanzou unha nova colección de tutoriais sobre o uso dos smartphone, centrados nesta ocasión no WhatsApp, en tanto que é unha ferramenta de comunicación masiva e o seu uso está enormemente estendido entre os maiores.

Estes novos tutoriais, un total de oito vídeos formativos, están dispoñibles en YouTube e pódese acceder a eles con tan só introducir as frases “Curso WhatsApp para maiores Fundacion Vodafone ou Curso #WhatsAppMayoresConecta2”. Pronto tamén estarán dispoñibles en www.fundacionvodafoneconlosmayores.com [3].

Os seus contidos abarcan desde a súa instalación no smartphone, pasando pola súa configuración, envío de fotos, vídeos, audios, contactos e localizacións, cuestións de seguridade a ter en conta,  así como a creación de grupos e listas de difusión.

Esta iniciativa enmárcase no compromiso da Fundación Vodafone España por dar a coñecer as TIC e as súas utilidades entre as persoas maiores posto que son un aspecto clave para promover a súa participación na sociedade actual, a vida independente e o envellecemento activo.