Down Galicia favoreceu case 130 empregos o último ano, e Cogami 96 a través dunha serie de iniciativas de TIC

• Down Galicia asegura que case o 70 % das persoas usuarias do seu programa tiveron unha oportunidade no ámbito laboral o ano pasado

O emprego con apoio, que ofrece acompañamento de persoas con síndrome de Down ou discapacidade intelectual durante o seu proceso de integración socio-laboral, favoreceu que 127 persoas do colectivo de Down Galicia contasen o ano pasado con polo menos un contrato de traballo en empresas ordinarias. Foron 50 de Vigo, 16 de Pontevedra, 15 de Santiago e da Coruña, 12 de Ferrol e de Ourense, e 7 de Lugo.

«Este dato supón que case o 70 % das persoas usuarias do programa de Down Galicia tiveron unha oportunidade no ámbito laboral o pasado ano», destaca esta entidade.

Tamén a Confederación Galega de Persoas con Discapacidade (Cogami) e a Fundación Vodafone España conseguiron a inserción laboral de 96 das 150 persoas que participaron nunha iniciativa para favorecer o emprego a través das TIC (tecnoloxías da información e a comunicación). As actividades realizáronse nas sete maiores cidades de Galicia, e de onde procedían a maioría dos participantes era da Coruña (25) e Vigo (24). O 64 % de inserción alcanzada supera ao 48 % que se pretendía alcanzar, afirma Cogami.