A Hora do Código chega a varios centros de ensino galegos da man do CPEIG

A entidade internacional Code.org [3], organismo público sen fins de lucro adicado a ampliar a participación en Informática, creaba en 2013 a Hora do Código, un evento internacional que consiste na introdución dunha hora de duración ás ciencias da computación, deseñada para amosar que todo o mundo pode aprender a programar e comprender os fundamentos desta disciplina. Cómpre dicir que esta iniciativa está apoiada polas grandes compañías tecnolóxicas, como Google, Amazon, Apple, Facebook e Microsoft, e por persoeiros como Bill Gates ou Mark Zuckerberg. Emporiso, esta semana o Colexio Profesional de Enxeñería en Informática de Galicia (CPEIG) levará a [4]Hora do Código a varios centros escolares e á Universidade [4], serán voluntarios os encargados de difundir a programación informática entre rapaces e rapazas de 3 a 17 anos.

As ditas actividades de programación informática levadas a cabo polo CPEIG contarán co apoio da Escola Superior de Enxeñaría Informática (ESEI) da Universidade de Vigo, o Campus de Ourense e a Facultade de Informática (FIC) da Universidade da Coruña.
O proxecto Hora do Código (Hour of Code), da entidade estadounidense Code.org, ten coma obxectivo o de ensinarlles programación e as bases da Informática ás nenas e nenos partindo de titoriais básicos dunha hora de duración.

Segundo o CPEIG, agárdanse a uns 400 rapaces nestas charlas dos centros de ensino, arredor de 140 participarán nas actividades da ESEI e unha cifra semellante na Facultade de Informática da Universidade da Coruña.

A Escola Superior de Enxeñaría Informática (ESEI) de Ourense organizará unha xornada o sábado día 17 en horario de mañá. A escola universitaria ofrecerá unha hora de código para os máis pequenos, robótica para o alumnado de ESO e Bacharelato,impresión 3D para todas as idades e obradoiros de drons para alumnado de Bacharelato.

En canto á Facultade de Informática da Universidade da Coruña, contará con obradoiros de programación para o mesmo día 17, de 12 a 13 horas.

Os centros de ensino que participarán na Hora do Código son: o CEIP Curros Enríquez de Celanova (9/12/2016- 13:30h; 13/12/2016- 12:30h); o CPR Sagrado Corazón de Celanova (9/12/2016- 10h); o CEIP Virxe da Pena da Sela do Irixo (15/12/2016- 9.30h); o IES San Mamede de Maceda-Ourense (9/12/2016- 12:50h); o CEIP de Vistahermosa en Ourense (7/12/2016- 9h) e o CEP de Ventín, Milladoiro-Ames (7/12/2016- 9:30h).

A información sobre estas xornadas irase actualizando paseniño na web do encontro [5].