Aberto o prazo de inscrición para unha nova edición do campamento tecnolóxico de verán Tecnópole Technological Workshops

O Parque Tecnolóxico de Galicia acaba de abrir o prazo de inscrición para unha nova edición do único campamento tecnolóxico de verán que se celebra en Galicia. Os Tecnópole Technological Workshops (T2W) chegan á súa cuarta cita anual o próximo mes de xullo e a inscrición xa está aberta.

O campamento terá lugar entre o 4 e o 15 de xullo e estará dirixido a 40 mozos e mozas de entre 12 e 18 anos. Todos os participantes traballarán no desenvolvemento de proxectos tecnolóxicos con diferentes graos de complexidade en función das súas idades. Para facelo posible, o programa incluirá nocións sobre biotecnoloxía, deseño de aplicacións móbiles e videoxogos, creatividade, biotecnoloxía, etc. Este ano a actividade estrela será de novo a robótica, á que se suma a programación, con sesións de formación tódolos días do campamento.

Aínda que a inscrición está aberta a estudantes de toda Galicia sen restricións, a proximidade xeográfica recomenda a actividade para persoas que residen ou mesmo que pasan o verán na provincia de Ourense.

As actividades do campamento están deseñadas en función das idades dos participantes. En calquera caso, os obxectivos que se perseguen son comúns e consisten no desenvolvemento da capacidade resolutiva e innovadora e na dinamización da axilidade mental e da creatividade. Ademais de procurar que os alumnos e alumnas adquiran novos coñecementos tecnolóxicos, preténdese potenciar neles actitudes como o respecto mutuo, a colaboración e a socialización, xunto con habilidades relacionadas con falar ben en público e a práctica do inglés.

Os monitores e profesores son expertos en didáctica da ciencia e da tecnoloxía e no resto das materias que se van a desenvolver na academia, aplicando unha metodoloxía dinámica, participativa, flexible, integradora e adaptada a cada tipo de idade.

Espírito de equipo

Todas as actividades desenvolveranse en equipo, mediante a formación de grupos de mozos da mesma idade, aos que se estimulará para conseguir a organización interna que lles permita desenvolver habilidades sociais a través da discusión dos proxectos, fomentando ao mesmo tempo o respecto entre os compañeiros e o traballo en equipo.

Dado que se trata dunha actividade integrada no tempo de vacacións dos participantes, tratarase de fomentar a aprendizaxe a través do xogo, potenciando a creatividade e baseándose nas emocións e experiencias persoais. Así, durante o campamento os participantes practicarán actividades deportivas en equipo ao aire libre, como a natación.

As aptitudes comunicativas e a expresión corporal terán un oco importante na axenda de todos os grupos de idade, con talleres para falar en público e sesións de debate. Ademais, recibirán educación ambiental, practicarán o inglés cunha profesora nativa durante a hora da comida e aprenderán hábitos de alimentación saudables.

O custo por participante será de 290 euros con todo incluído, desde o transporte desde varios puntos da cidade de Ourense até a comida e todas as actividades. A preinscrición está xa aberta na web t2w.tecnopole.es [3].