Mulleres no sector tecnolóxico

O ministro de Sanidade, Servizos Sociais e Igualdade en funcións, Alfonso Alonso, instou ás empresas tecnolóxicas a colaborar para acabar cos "clichés" sobre a masculinidade do sector e emprender accións para potenciar o número de mulleres que elixen carreiras profesionais relacionadas coa tecnoloxía.

"Non só é unha cuestión de xustiza, é unha cuestión da calidade do cambio que podemos impulsar para ser competitivos", subliñou o ministro en funcións, que sinalou que, segundo as previsións da UE, no 2020 haberá un total de 825.000 empregos vacantes no sector.

Alonso sinalou que, actualmente, o 18% dos postos de traballo do sector tecnolóxico en España están ocupados por mulleres, unha porcentaxe que, segundo indicou, "aínda é moi pouco" e ten que ver coa "falta de referentes" de inventoras e mulleres que tiveron éxito no sector.

Ademais, segundo os datos achegados por Microsoft, a porcentaxe de mulleres entre os graduados en carreiras técnicas en España é do 24% e "só o 8% das nenas de 15 anos asegura que quere estudar Informática, mentres que case o 25% dos nenos desa idade afirma querer facelo".

O ministro en funcións participou no evento 'Construíndo o fututo #MakeWhatsNext' organizado por Microsoft e máis dunha ducia de empresas tecnolóxicas, no marco da celebración do 'Día das Mulleres na Tecnoloxía' que se conmemora este xoves, para impulsar as vocacións profesionais ás carreiras científico-técnicas entre as mozas españolas.

"As nenas e mozas só coñecen referentes masculinos no ámbito tecnolóxico porque non se lles propuxeron modelos femininos, que os hai --asegurou Alonso--. Cando unha nena sente unha atracción polas ciencias na maior parte dos casos esa chama apágase na adolescencia".

 

#MakeWhatsNext

Microsoft e unha ducia de empresas entre as que están Asus, Lenovo, Meta4, Panda, Linkedin, Junior Achievement ou Womenalia, entre outras, puxeron en marcha este xoves a plataforma '#MakeWhatsNext', unha iniciativa que pretende servir de referente para as nenas e novas interesadas pola carreira tecnolóxica e onde poidan recibir o asesoramento de mulleres tecnólogas.

A plataforma presentouse este xoves no evento 'Construíndo o Futuro #MakeWhatsNext' no que Microsoft e o resto de empresas que colaboran na iniciativa congregaron a 250 persoas entre escolares, estudantes universitarias e mulleres profesionais do ámbito da tecnoloxía para unha xornada de "mentoring, coaching e networking" que axude ás futuras tecnólogas a afianzar os seus proxectos e coñecer "referentes" femininos no sector.

O obxectivo da plataforma 'online' será, por unha banda, que as participantes na xornada poidan manter o contacto e seguir avanzando, así como que outras mozas españolas poidan participar na iniciativa.

Neste sentido, Alonso, instou ás participantes durante o evento a "contalo nas súas casas, colexios e universidades" para "facer viral" a realidade das mulleres que queren dedicarse ao sector tecnolóxico.