Compostela organiza un concurso de modelado 3D para promover a educación ambiental

Dende o Concello de Santiago de Compostela chegábanos onte o anuncio da convocatoria dun concurso organizado polo mesmo Goberno local, a Universidade de Santiago (USC) e a empresa Ferrovial, trátase do COMPOS3D de modelado 3D a partir de fotografías. Esta proposta xorde coa vontade de fomentar a través dos móbiles a educación en valores medioambientais e converte a Compostela na primeira cidade do mundo en empregar o modelado 3D a partir de fotografías para tal fin. É preciso sinalar que o certame enmárcase nas actividades de celebración na cidade do Día Mundial do Medio Ambiente, estando encamiñado a estudantes de entre 14 e 17 anos.

Indo ao concurso en si mesmo, como xa adiantamos está promovido pola USC, a través do seu Instituto de Biodiversidade Agraria e Desenvolvemento Rural (IBADER) e do grupo de investigación D3MOBILE. Nel poden participar equipos formados por un alumno e o seu profesor, de calquera centro de ensino regrado de Galicia. E que ferramentas se poden empregar neste certame? Pois dende un teléfono móbil, a unha tableta ou un computador, con estes trebellos os participantes realizarán un modelo 3D virtual a partir dun obxecto da súa contorna. Tamén terán que elaborar un vídeo do modelo, que poderá ser editado. En canto a premios, o concurso COMPOS3D entregará catro premios: dous para os mellores equipos de centros de Santiago, e outros dous para os mellores traballos de Galicia. Alén destes catro, concederanse outros dous premios para os centros educativos que acaden unha maior puntuación sumando as dos equipos adscritos aos mesmos. Haberá un galardón para o mellor centro de ensino de Compostela e outro para o mellor de Galicia.

Os premios para os centros consistirán nunha impresora 3D valorada en 450 euros e os galardóns para os equipos serán dúas tabletas (unha para o alumno e outra para o profesor) valoradas en 550 euros cada una. Cómpre subliñar que o 2 de maio remata o prazo para presentar os traballos, que serán valorados pola súa creatividade, orixinalidade, calidade e beleza, así como polo grao de vinculación coa temática do medio ambiente.Por outra banda, informar que aínda permanece aberto (até o 13 de maio) o prazo para inscribirse no concurso COMPOSfoto 2016, organizado polas mesmas entidades e coa fotografía como técnica a empregar para o mesmo fin.