As entidades avogan por unha formación TIC integral nas familias no Día da Internet Segura

A necesidade de traballar a prol dunha Sociedade da Información libre á par que segura segue vixente nesta segunda semana de febreiro. Se nas xornadas previas falamos da celebración do Día da Protección de Datos en Europa (celebrado na nosa terra por entidades como o Colexio Profesional de Enxeñaría Informática de Galicia, a Facultade de Informática da Coruña ou o centro tecnolóxico Gradiant), hoxe 9 de febreiro é a quenda de festexarmos o Día da Internet Segura, un evento dirixido en parte a pór acabamento ás ameazas e riscos que poden atopar nenos e adolescentes no seu día a día dixital e que se desenvolve baixo o seguinte epígrafe Xoga o teu papel para unha Internet mellor. Boa parte dos manifestos ao respecto deste día coinciden nun mesmo punto: cómpre máis formación e sensibilización TIC entre a rapazada pero tamén de cara a nais, pais e profesores.

Entre as asociacións máis significadas a prol de visualizar a xornada atópase a Asociación Xeral de Consumidores, ASGECO, que xa emitiu un comunicado convidando a nais e pais a participaren activamente na formación do emprego de Internet por parte dos seus fillos, facendo fincapé, unha vez máis, nos factores educación, sensibilización e formación, que son a fin de contas os piares sobre os que se ten que apoiar a Internet segura máis acaida. Segundo lembran, “durante o tempo que os menores pasan conectados a Internet poden ser vítimas dos riscos propios destas contornas cibernéticos: contidos inapropiados, técnicas agresivas de publicidade e vulneración da privacidade, pero tamén acoso e extorsión”. A asociación recorda ás nais e pais que son eles os “principais responsábeis” dos actos dos seus fillos e fillas menores, non só na vida off line que todos coñecementos, senón tamén “na outra vida que desenvolven por Internet”.

Por esta razón, ASGECO recomenda aos proxenitores aproveitar os sistemas de control instalados por defecto nos terminais electrónicos (televisores, computadores, teléfonos móbiles, consolas, tabletas informáticas, etc.), asegurarse da correcta configuración de seguridade do seu equipo e a protección da súa rede Wi-Fi. Ademais, a asociación convida a nais e pais a familiarizárense co uso da informática e das redes sociais, “co fin de fomentar a educación, o diálogo e a concienciación dos consumidores máis novos para previr todo tipo de prácticas perigosas”. Para facer fincapé en todo isto xa se puxo a disposición dos internautas un vídeo explicativo e unha aplicación para dispositivos en varios idiomas en colaboración cos socios europeos da Confederación de Asociacións Familiares da Unión Europea, COFACE.

A xornada
Dende Chaval.es, a web do Goberno central para formar e informar en novas tecnoloxías ás novas xeracións, recórdase que o evento está organizado polo Insafe (European network of Awareness Centre) e INHOPE (International Association of the Internet Hotlines) co apoio da Comisión Europea. Co gallo da celebración deste día, coñecido como Safer Internet Day 2016, o devandito portal e Chaval.es organizan unha xornada referencial para visualizar as diferentes iniciativas que se promoven en España para garantir unha contorna dixital máis segura para os menores. O portal tamén recorda que o Día da Internet Segura ten Facebook e Twitter de seu, sitios a través dos cales é posible que nenas, nenos, adolescentes, nais, pais e profesores se sumen á convocatoria.