A mocidade enxeñeira de Galiciencia sácalle punta á tecnoloxía

Comezou Galiciencia, a nosa maior feira científico-tecnolóxica para a mocidade e unha das máis referenciais do eido estatal, e quen queira enxeños, inventos e trebellos innovadores sen dúbida que vai ter unha boa ración na carpa habilitada pola organización (Tecnópole) en Ourense até este venres: un recinto que dá acubillo á ciencia do noso futuro (74 proxectos de 17 concellos galegos). Segundo informan os impulsores da feira, que celebra este ano a súa décima edición, o evento exhibe estes días solucións moi creativas e avanzadas para todo tipo de retos e problemas da nosa vida cotiá: retos e desafíos ligados á alimentación, á mobilidade, á accesibilidade, á enerxía sustentábel e á seguridade, entre outros temas. Nun plano máis concreto amósanse na carpa cousas como un bastón TIC para peregrinos ou un espantallo móbil respectuoso cos paxaros. Ver para crer.

A feira científica agarda a visita de máis de 2.000 escolares durante os seus tres días de duración, aos que se suman os asistentes que se achegan pola súa conta, dado que o evento é de entrada libre. Como dixemos os días pasados, a Galiciencia rexistra este ano unha cifra récord de proxectos, un total de 74, dos que os 52 de Secundaria compiten polo premio final, mentres que os 22 de Primaria se expoñen fóra de concurso. A representación máis numerosa procede das provincias de Ourense e Pontevedra, con 23 e 22 proxectos respectivamente. Da Coruña chegaron 14 e de Lugo 9, aos que se suman 4 de Barcelona e 2 de Biscaia.

Polo que respecta ao ámbito temático das novas tecnoloxías da información, en Galiciencia pódense ver estes días iniciativas tan interesantes como a dun grupo de estudantes de Pontevedra que ideou un sofisticado sistema de lectores de etiquetas automáticos para identificar alérxenos nos produtos do supermercado, adaptado para invidentes a través de alertas sonoras e para varios idiomas. “Aínda que o seu prototipo está preparado para ser incorporado ao carro do súper, traballan xa nunha aplicación móbil para que os consumidores o poidan levar nos seus dispositivos intelixentes”, informa a Tecnópole, que tamén salienta os esforzos aplicados pola nosa mocidade desenvolvedora en materia de seguridade e accesibilidade, ámbito no que se insiren as tecnoloxías achegadas por dous equipos de estudantes de Santiago e Pontevedra: dous bastóns TIC, un para peregrinos, dotado de sistema de aviso a emerxencias en caso de perigo, e outro para invidentes, con GPS e detectores de obstáculos a distancia para mellorar a a autonomía dos usuarios. Na seguridade pensaron tamén as alumnas de Ourense que deseñaron un detector de asolagamentos que permite identificar o perigo de inundación a distancia con antelación e reaccionar a tempo.

Sen saírmonos do plano TIC, a feira tamén amosa, procedente das Aulas Tecnópole, unha plataforma web para móbiles e tabletas deseñada para a compravenda de produtos agrícolas a pequena escala sen necesidade de intermediarios, co fin de reducir prezos para os compradores e aumentar a marxe comercial dos vendedores. Tamén se pode ver estes días, entre outras moitas cousas, un espantallo móbil para viñas respectuoso cos paxaros (da man dun equipo de novos enxeñeiros de Santiago), un sistema para aproveitar landras para fabricar aglomerados (achegado por un equipo de Ourense) e un biodixestor doméstico para obter gas de cociña nun campamento de estudantes de Barcelona.