Telefónica Educación Dixital lanza o proxecto Desafío STEM

Neste concurso haberá equipos cun máximo de sete alumnos, sempre dirixidos por un profesor. Para gañar hai que desenvolver solucións tecnolóxicas innovadoras (xogos, aplicacións, realidade aumentada, etc.) que esperten o interese da sociedade, transmitindo a importancia de "ser un país creador de tecnoloxía para lograr maior produtividade e competitividade", segundo Telefónica.

A inscrición é gratuíta e os grupos poden comezar a apuntarse desde este mesmo mes. Terán que elixir entre catro categorías para desenvolver o proxecto. En primeiro lugar poden optar pola categoría Internet das Cousas (IoT en inglés), onde hai que conectar un obxecto cunha finalidade concreta como moverse ou localizalo; en segundo lugar está a Educación Dixital, no que haberá que elaborar un recurso educativo dixital tendo en conta a programación e o deseño; o eHealth - Saúde propón axudar a alguén, iso si, a través dunha solución tecnolóxica que estea relacionada coa saúde, a nutrición ou o deporte; por último atópase a opción Smart Industry, na que o grupo que a elixa deberá crear un dispositivo que teña por obxectivo mellorar a súa contorna produtiva máis próxima. Toda a información estará dispoñible nas plataformas de aprendizaxe de Telefónica Educación Dixital, polo que non se necesitará experiencia previa nin en programación nin en robótica.

Desafío STEM durará o que dure o curso escolar. Durante o período lectivo o proxecto encargarase de ir lanzando unha serie de retos que os equipos terán que superar para demostrar cal é a mellor solución tecnolóxica. Xerarase unha comunidade na que todos observarán os seus avances a través da web e redes sociais, na que se pode achegar calquera opinión.

Como non, tamén haberá premios: recompensaranse os mellores proxectos de cada unha das categorías cunha viaxe por cada equipo, no que poderán visitar unha das entidades máis importantes do mundo nas áreas STEM. O centro escolar que presentase máis proxectos (e mellores) obterá unha dotación tecnolóxica de última xeración para uso educativo.