Un smartwatch para cegos? Si, con "pantalla" braille

Seguro que o recoñecemento de voz e os asistentes poden conseguir que os dispositivos móbiles sexan máis accesibles, pero antóllasenos moi complicado que un reloxo intelixente sexa utilizado con facilidade por unha persoa con problemas na visión. Coas persoas cegas como prioridade, está a xestarse o reloxo Dot.

Unha startup coreana está a desenvolver a idea, que basicamente se basea no braille, e o seu sistema de comunicación por puntos con relevo. En lugar de ter unha pantalla táctil - entendemos táctil por convencional - na superficie do que sería a parte principal do reloxo, temos unha matriz de puntos.

Eses puntos elévanse de forma independente para dar forma á información en braille, e a partir de aí podemos imaxinar notificacións, hora, ou mensaxes, que só poderá ler o usuario, e non o resto de xente que estea ao redor, como ocorrería cun asistente.

Un dos puntos fortes de Dot, que se atopa buscando axuda en plataformas de financiamento, é o seu prezo, xa que queren polo no mercado por baixo dos 300 dólares. Non é barato, pero ao ser unha cousa tan especial, con compoñentes tan dedicados ao gadget, non nos parece desatinado.

A 'pantalla' estaría formada por catro grupos con seis puntos cada unha. Suficiente para mostrar catro caracteres braille á vez. Podemos cambiar o modo de velocidade na que se actualizan os puntos, xa que un usuario avanzado podería ler moito máis contido por segundo que alguén que estea a comezar.

Como vos comentei unhas liñas máis arriba, contémplase que as notificacións e datos cheguen desde un teléfono móbil, que se conectaría con Dot vía Bluetooth 4.0. En canto á batería, un uso intensivo levaríao a morrer nunhas dez horas, pero cun uso moderado podería manterse activo durante cinco días. É de supor que os mecanismos implicados consumen máis que os leds dunha pantalla.

Se todo vai como parece, será unha realidade en decembro de 2015, nos Estados Unidos, por menos de 300 dólares. Nunha primeira rolda conseguiu 600.000 dólares, e nunha segunda espera conseguir unha cifra próxima ao millón.