A Teleasistencia de Segunda Xeración

Cruz Vermella Española aposta desde hai máis de dúas décadas polos sistemas que combinan a tecnoloxía e os coidados directos na atención ás persoas maiores e/ou dependentes. A provisión de servizos neste ámbito vai acompañada de iniciativas de investigación aplicada que permiten rendibilizar ao máximo o potencial da tecnoloxía para mellorar a calidade de vida e a seguridade das persoas maiores.

O traballo que se presenta é froito dunha investigación que contou co asesoramento da Dirección Xeral de Saúde Pública e Sanidade Exterior do Ministerio de Sanidade, Política Social e Igualdade e tivo como como obxectivo determinar se a instalación dun sistema tecno-asistencial no domicilio diminúe a morbilidade, así como as consecuencias económicas e sociais dos accidentes domésticos.

O proxecto Teleasistencia Segunda Xeración, configura un sistema asistencial nos fogares dirixido á redución de accidentes e á mellora da autonomía e seguridade dos usuarios. A investigación tenta pór de manifesto que este tipo de sistemas que combinan a teleasistencia domiciliaria con distintos sensores (detectores de fumes, gas, caídas, presenza, presión...) procuran -ademais dos obxectivos descritos- unha mellora na calidade de vida dos coidadores familiares e reducen a necesidade de asistencia persoal a domicilio e a utilización de recursos sociais, así como os ingresos hospitalarios non programados ou en residencias asistidas.

Para a realización deste estudo prospectivo, Cruz Vermella Española contou coa inestimable colaboración de investigadores e epidemiólogos do Instituto de Saúde Carlos III, co apoio da Fundación Vodafone España e coa de persoas usuarias do servizo de teleasistencia de Cruz Vermella e as súas familias, a través de dous grupos, de intervención e control compostos respectivamente por 1650 e 1646 persoas. A toma de datos desenvolveuse durante 18 meses.

A comparativa entre ambos os grupos arroxa unha serie de resultados que se relacionan con melloras na taxa de accidentalidade (redución de accidentes, menos danos), menor mortalidade, prolongación da vida no domicilio habitual, mellor percepción dos familiares achega do coidado e melloras no seguimento e control dos usuarios.