As actividades extraescolares vinculadas ás novas tecnoloxías son as favoritas dos máis novos

As TIC e as novas xeracións semellan combinar ben, sempre e cando a relación entre unhas e outras se leve a cabo con sentidiño. Así o indica o Primeiro Estudo sobre Extraescolares e Novas Tecnoloxías, elaborado por ConMasFuturo para toda España e para todas as Comunidades. Máis polo miúdo, os alumnos de Primaria e Secundaria de Galicia consideran máis atractivas as actividades extraescolares baseadas nas novas tecnoloxías que outras actividades de apoio á formación, segundo se conclúe dos datos da dita investigación. Deste xeito, en Galicia un 67% dos mozos e un 46% das mozas en Educación Primaria indica que, á hora de elixir unha actividade extraescolar, prefiren Minecraft, robótica ou desenvolvemento de videoxogos, en troques doutras como inglés, judo ou xadrez.

Asemade, segundo o estudo, o 78% dos mozos e o 64% das mozas que cursan estudos de Secundaria sinalan entre as súas extraescolares preferidas o desenvolvemento de aplicacións móbiles, a programación de páxinas web e a robótica, fronte a outras materias que nalgúns casos poden chegar a percibir coma un castigo.

O estudo baseouse nunha enquisa presencial e en liña realizada ao longo deste mes de maio, na que participaron 2.000 alumnos e alumnas residentes en España e que se levou a cabo co obxectivo de coñecer as súas preferencias á hora de elixir actividade extraescolar.

Os resultados deste estudo para toda España amosan que un 68% dos alumnos e alumnas de Primaria e até un 74% dos de Secundaria optarían, de poder elixir, por actividades extraescolares relacionadas coas novas tecnoloxías.

“Estas ferramentas acabarán sendo como o inglés, unha materia que hai anos poucos estudaban, pero que agora os nenos e nenas aprenden desde a infancia. As novas tecnoloxías baséanse nunha linguaxe que eles adquiren dunha forma natural, como montar en bicicleta ou patinar, e que lles permite acceder a un mundo cheo de posibilidades”, explica Antolín García, fundador de ConMasFuturo.