Santiago acolle o IX Encontro Estatal de Persoas Xordas Maiores

A conselleira de Traballo e Benestar, Beatriz Mato, avogou pola inclusión, o envellecemento activo e a solidariedade interxeneracional como obxectivos 'fundamentais' na área social, que permitirán consolidar a Galicia como unha sociedade 'máis madura, saudable e igualitaria'.

Así o destacou durante a inauguración do IX Encontro estatal de persoas maiores xordas que se está celebrando en Santiago de Compostela e no que apuntou que este 'compromiso solidario' é compartido pola Xunta de Galicia e as entidades do terceiro sector, como FAXPG (Federación de asociacións de persoas xordas de Galicia).

Deste xeito, 'o apoio a todas as persoas sen excepción, a busca da súa integración, e a igualdade plena de dereitos e oportunidades' converteuse nunha das principais liñas de actuación deste departamento autonómico, que en 2015 incrementou por segundo ano consecutivo o orzamento destinado á atención á discapacidade, até chegar aos 100 millóns de euros.

Dentro deste apoio, o emprego adquire un papel salientable, en tanto é, segundo Mato, a mellor 'ferramenta de integración que existe'. Por iso, as iniciativas vinculadas á discapacidade e ao campo laboral contan un orzamento duns 18 millóns de euros.

Ademais do compromiso orzamentario, Mato lembrou outros avances normativos que se acometeron co fin de apoiar ao colectivo de persoas con discapacidade. Entre outros, citou a nova Lei de accesibilidade de Galicia, que entrou en vigor o mes pasado e actualiza o marco lexislativo; ou as novidades en atención temperá, como a aprobación do primeiro decreto e do protocolo de coordinación, a constitución do Consello autonómico, e a creación da rede galega de atención temperá. A este respecto, destacou a relevancia de impulsar a atención temperá, un aspecto de gran importancia para as persoas con discapacidade auditiva.

O Encontro céntrase tamén no envellecemento activo, un obxectivo 'fundamental para que as persoas maiores leven unha vida activa e para que esta sexa saudable e plena'. Para avanzar nesta liña, a Consellería puxo en marcha en 2013 unha Estratexia para a prevención da dependencia, que inclúe 400 medidas até 2020. Ademais, ese mesmo ano, a Comisión Europea nomeou a Galicia como rexión de referencia do envellecemento activo, polos avances realizados especialmente en novas tecnoloxías.

A renovación na atención social tamén se reflicte no novo modelo de carteiras, que pon o acento nos servizos máis que nas infraestruturas. Actualmente, está en vigor a destinada ás persoas con dependencia, e proximamente publicaranse a de persoas con autonomía, familia e infancia ou inclusión. Tanto na de dependencia, como no borrador da de persoas con autonomías, recóllense servizos específicos para persoas con discapacidade auditiva, detallou Mato.
'En definitiva, traballamos da man das entidades de iniciativa social para conseguir unha integración social plena das persoas con discapacidade, e máis aínda se se trata de persoas maiores, como é o caso do encontro celebrado hoxe', terminou Mato.