A tecnoloxía WIMy de localización sen cobertura busca apoios en Indiegogo

Unha startup de Bilbao, de nome Appkideak, vén de lanzar a que sería a primeira tecnoloxía bluetooth tracker do ámbito estatal que é quen de indicar a nosa localización sen necesidade de cobertura. A tecnoloxía WIMy de Appkideak consiste nun dispositivo de tamaño moi miúdo (ocupa pouco máis ca unha moeda) que se vencella a noso dispositivo e que podemos configurar a través dunha aplicación dispoñible en datas vindeiras para iOS e Android. Segundo informa a empresa vasca, o pulo a WIMy compleméntase cunha campaña de crowdfounding (micromecenado nas plataformas en liña) na páxina Indiegogo para empezar a comercializar o sistema. Este, subliñan, ten o valor diferencial de permitirnos estar conectados aos nosos obxectos ou seres queridos, de xeito permanente, e co fin de evitarmos perdelos ou de atopalos máis decontado.

Ademais, a tecnoloxía en cuestión avísanos cando nos afastamos dun obxecto ou persoa querida e, en caso de extravío, “é o único sistema da súa categoría até a data capaz de indicarnos a dirección na que se atopa”, explican os seus desenvolvedores, que concretan que a tecnoloxía utilizada permite que WIMy funcione en situacións sen cobertura, nun rango de até 50-60 metros. “Ademais”, din, “consume moi pouca batería e a pila de botón é facilmente substituíble”. Este sistema está dirixido, sobre todo, a pais novos con fillos pequenos; donos de mascotas; grupos de escolares, etc. Tamén pode ser de gran utilidade en centros comerciais, parques e demais espazos públicos, engaden.

Para empezar a comercializar WIMy, AppKideak lanzou unha campaña de prevenda no portal Indiegogo no que se poderá adquirir WIMy a “prezos especiais”, desde 25 euros as primeiras 100 unidades. Para o resto da campaña, poderase adquirir WIMy a 30 euros por unidade. Posteriormente, o prezo de venda ao público será de 35.